Due cuori e una provetta
|
C'l artìcul chè 'l è scrit in
Miranduléś |
 The Switch
| ||
| Due cuori e una provetta | ||
 Jason Bateman e la Aniston in na figùra dal film | ||
| Dū cōr e na pruvéta 2010 | ||
|---|---|---|
| Regìa: Josh Gordon • Will Speck | ||
| Scritōr: Jeffrey Eugenides • Allan Loeb | ||
| Atōr: Jennifer Aniston • Jason Bateman Jeff Goldblum • Patrick Wilson • Juliette Lewis | ||
| Müsica: Alex Wurman | ||
| Léngua: Ingléś | ||
| Dürä dal film: 101 minüt | ||
| Nasiōṅ: Stat Unî | ||
Due cuori e una provetta (Dū cōr e na pruvéta) l'è na cumèdia dal 2010 dirèta par Josh Gordon e par Will Speck giràda a New York.
Custàda daśnóṿ migliòṅ ad dòlar, la 'n à pò fat sù dagnóra sinquànta.
Sunt
La Kassie Larson (Jennifer Aniston) l'è na dóna puta 'd quarànt'an ch'la vrév avér un fiōl anc parchè 'l arlój biulògic par lē a n gh lasa minga tant tèmp dònca la gh'à da dascantàr-'s e in présia. La sò dutōra l'à bèla preparâ incòsa, 'n intervènt 'd inseminasiòṅ artifisiàla, a gh manca sōl na pruvéta impinìda. Wally Mars (Jason Bateman) 'l è 'n sò amìg da dimóndi tèmp e al vrév èsar lò 'l dunatōr anc parchè in segrét al s è inamurâ. A gh'è sōl un prubléma, al gh'à sèmpar paùra 'd avér-ag quèl, cuma 'n càncar a i maròṅ, e pò la Kassie la s catarév in imbaràs a tōr qvél 'd un sò amìg che par lē 'l è sèmpar pesimìsta. Piutòst la dóna, ch'la gh'à 'n ciòld fis in dla suca: „la vita l'è adès“, la 'l vrév frésc e minga ślâ, dna parsòna ch'a s pòsa védar cum 'l è, anc ad caràtar, pò s'l è élt e inteligìnt incóra méj.
Un dè Wally al ricév na létra da la Kassie ch'la 'l invìda a la sò fèsta dla scménsa, pinsàda insém a la sò amìga Debbie (Juliette Lewis), e a gh piaśrév ch'al vgnis anc lò, pò la dmanda pardòṅ p'r al dòpi sèns. A 'l ricevimènt Wally al cgnós al dunatōr sarnî par la sò amìga, Roland (Patrick Wilson), insgnànt a la Columbia University ch'l al fà parchè al gh'à biśógn ad bèsi.
Méntar 'l è in bagn a pisàr mèś ciùc Wally sénsa vlēr al stramna in dal lavandèṅ la pruvéta pîna 'd śbòra 'd Roland e dònca a n gh armàgn àtar da far che impinìr-la lò parchè 'l diśàstar 'l è bèla fat. Finìda la fèsta al finìs imbariàg sénsa 'rcurdàr gnint a cà dal sò culéga 'd lavōr Leonard (Jeff Goldblum).