Dark bar
|
C'l artìcul chè 'l è scrit in
Miranduléś |
 Dark bar
| ||
 La Barbara Cupisti in na figùra dal film | ||
| Bar scûr 1989 | ||
|---|---|---|
| Regìa: Stelio Fiorenza | ||
| Scritōr: Stelio Fiorenza | ||
| Atōr: Marina Suma • Richard Hatch • Barbara Cupisti Barbara Cupisti • Patrizia Bettini • Vincenzo Regina Alessandra Stordy • Maurizio Panici • Lea Martino | ||
| Müsica: Carlo Siliotto | ||
| Léngua: Itagliàṅ | ||
| Dürä dal film: 89 minüt | ||
| Nasiōṅ: Itàglia | ||
Dark bar (Bar scûr) 'l è 'n film thriller dal 1989 ad Stelio Fiorenza. 'L è stâ girâ in Lumbardìa.
Sunt
L’Elisabetta (Barbara Cupisti) la ricév na telefunàda in dua 'n tisi c'n i bafi al gh diś ad véd'r-as a 'l “Dark bar”, un lucàl nutùran par śōvan. 'L óm al s mét 'd acòrd sèg par far-ag catàr un gabardèṅ rós in dla stasiòṅ di trên che lē la gh'à da mét'r-as. Prima 'd andàr via, lì lē la lasa 'n mesàǵ in segreterìa a sò surèla Anna (Marina Suma), una ch'la sòna 'l trumbòṅ in un pub jazz, al “Blue Sister's Bar”.
Rivàda là, la ragàsa la và in di lìcit dal “Dark bar” par cambiàr-'s ad vistî ma tut 'd un trat la vèṅ cupàda da 'n óm c'n un capèl in cô ch'al gh pòrta via la burséta. Quànd l’Anna la tórn' a cà da 'l lavōr la sènt al mesàǵ ch'la gh'iva lasâ sò surèla. Chi lē la vliva dascórar sèg p'r un quèl impurtànt ma minga par dmandàr di bèsi in prèst cuma 'l sòlit. P'r al fat ch'l'è tri óri dòp meśanòt, la decìd però ad tōr la piréta in maṅ, śmursàr la luś e tacàr a durmìr. In cal mént'r ad fóra dal sò apartamènt a s véd 'n óm ch'al gh'à tgnû drē in fiṅ sóta la cà.
Al dè dòp, a n avénd minga nutìsi 'd lē e cun na sò amìga ch'la l'à ciamàda in pinsēr, l’Anna la la và a catàr a cà sua ma la cata invéci 'l apartamènt vōd cun tut par tèra, 'l telèfun tajâ e na caséta dla segreterìa in dua a s sènt 'n óm ch'al la spétava a 'l “Dark bar”. La sunadōra la dmanda infurmasiòṅ in gir e la cgnós acsè al murós dl’Elisabetta, Marco (Richard Hatch), òṅ ch'al lavóra in un cineclub. Chi lò al gh diś ch'al gh'iva 'd andàr via cun sò surèla la sira prima ma pò qvista chè la n s éra briśa fata védar. Esénd da par lò, al gh dmanda pò 'n favōr, qvél 'd andàr a scultàr s'in sala a s sènt bèṅ al sunōr. Méntar lē la và là par far-'g un piaśēr, i rìvan lè dū farabùt, Griso (Vincenzo Regina) e 'l sò cap (Mauro Festa), ch'i gh dmàndan c'n un curtèl in maṅ in du l'is lugâ la ròba. Chi lōr i péscan dla dròga ad sò surèla. L’Anna la gh la cava a scapàr via e a dmandàr dgl'infurmasiòṅ a n'amìga dla vitma ch'la fà l'atōra 'd teàtar, la Stefania (Patrizia Bettini), ch'la cònta che sò surèla l'iva fat un ricàt a dla gint più granda 'd lē e ch'l iva scrit incòsa in un diàri.