Daria Bignardi

Da Wikipedia.
C'l artìcul chè 'l è scrit in Miranduléś Emiliàn


La Daria Bignardi (Frara, 14 ad favràr dal 1961) l'è na giurnalìsta, scritōra e cundutóra televiśìva emigliàna.

L'è spuśàda da 'l 2004 c'n al giurnàlista Luca Sofri, fiōl 'd Adriano e la gh'à dū fiōi: l’Emilia e Ludovico, quést chè nâ da 'l matrimòni precedènt cun Nicola Manzoni, insgnànt ad filuśufìa in un licèo dal milanéś e fiōl dal cumpuśidōr Giacomo Manzoni.

Biugrafìa

La Daria Bignardi in dal 2010

Dòp èsar-'s diplumàda a 'l licèo clàsic "Ludovico Ariosto", la s trasferìs a Bulógna par studiàr a 'l DAMS, cōrs ad làurea in Disiplìni di Arti, dla Mùśica e dal Spetàcul in dla facultà ad Létri e Filuśufìa. La mòla i studi dòp 'n an parchè la pénsa 'd n èsar mia in dal sò ambînt.

A vint-a-tri an (in dal 1984) la sa stablìs a Milàṅ e la taca a lauràr p'r al setimanàł Panorama dla Mondadori. In dal 1988 la pasa a Chorus, mensìl ad Leonardo Mondadori. In dal 2000 la ciapa a Alghéro al Prèmi Nasiunàl Alghero Dóna ad literadùra e giurnàliśum (VI edisiòṅ).

In dal Śnar dal 2009 l'à publicâ par la Mondadori al lìbar autobiugràfic Non vi lascerò orfani ch'l à purtâ a cà dal crìtichi bòni (anc una ad Goffredo Fofi) e 'n sucès grand dimóndi 'd pùblic vinsénd al prèmi Rapallo Carige p'r al scritōri dóni (20 Śugn 2009), al prèmi Elsa Morante par la naratìva (Roma, 14 Utóbar 2009) e 'l prèmi Libraio Città di Padova (2009).

Televiśiòṅ e Ràddio

Giurnàlista prufesiunìsta da 'l 1992, la lavóra bèla in dal 1991 in dla redasiòṅ dal prugràma ad Rai 3 Milano, Italia faghénd i tèst, soquànt, par Gad Lerner e pò par Gianni Riotta. In dal 1994 la dvénta n'inviàda da Milàṅ p'r al prugràma culturàł Punto e a Capo dla Rai 2.

Da 'l 1995 a 'l 2008 l'à cundót tut i Giuidè la rubrìca di lìbar La mezz'ora Daria su Radio DeeJay insém a Linus e Nicola Savino.

In dal 1995 la giurnalìsta la vèṅ 'duciàda par Gregorio Paolini, ch'al gh śibìs ad tōr al pòst dl'Alessandra Casella in dla cundusiòṅ dla rubrìca literària A tutto volume par Canale 5, ch'l'iva vins al prèmi Flaiano par la televiśiòṅ ad qualità. Sèmpar par Canale 5 la pòrta avànti al talk show culturàł Corto Circuito in di an 1996 e 1997. Tulénd ispirasiòṅ da i talk show americàṅ, l'à pinsâ e cundót par l'Italia 1 al prugràma Tempi moderni (Tèmp mudéran, prèmi Alghero p'r al giurnalìśum), dal 1998 al 2001. Da 'l 14 ad Setémbar a 'l 21 ad Dicémbar dal 2000 la Bignardi la preśénta la prima edisiòṅ dal Grande Fratello (Grand Fradèl) par Canale 5 muciànd sù di ascōlt record e vinsénd al Telegàt e 'l Oscar dla TV. La fà cumpàgn anc 'l an dòp cun la secónda edisiòṅ.

In dal 2002 la dvènta diretōra dal mensìł Donna (Hachette Rusconi Editōr) e in Maǵ la taca la cundusiòṅ dal prugràma ad lìbar setimanàł Lando par l'Italia 1. Da 'l 6 'd Avrìl a 'l 2 ad Śugn dal 2004 la tórna a 'l reality show preśentànd la prima edisiòṅ 'd La fattoria, sèmpar in sl'Italia 1.

A la fiṅ d'l an la pasa a La7 par far al talk show Le invasioni barbariche (Gl'invaśiòṅ barbàrichi) cun di arcgnusimènt impurtànt dla crìtica e la vins al sò secónd Telegàt (2007), 'l Oscar dla TV, al Premiolino, al Prèmi Ideona e 'l Oscar dal Rifurmìsta. In dal Dicémbar dal 2008 la Daria la mòla la traśmisiòṅ firmànd un cuntràt par la Rai.

Da 'l 20 ad Mars dal 2009 la tórna a Rai 2 par la cundusiòṅ dal prugràma nóṿ dal Verardè L'era glaciale ma pò la tórna in si sò pas tulénd incóra part a Le invasioni barbariche par La7 (Setémbar 2010).