Contenders. Serie 7

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Series 7: The Contenders
Contenders. Serie 7
Contenders. Serie 7.png
La Marylouise Burke in na figùra dal film
Cuncurènt. Sétma série
2001
Regia: Daniel Minahan
Scritùr: Daniel Minahan
Atùr: Brooke SmithMichael KaycheckMerritt Wever
Richard VentureMarylouise BurkeGlenn Fitzgerald
Müsica: Girls Against Boys
Lengua: Ingléś
Dürä dal film: 87 minüt
Nasiòṅ: Stat Unî


«
Siē cuncurènt, siē barsàj, un prèmi sōl: la vita.»
(Tagline dal film)


Contenders. Serie 7 (Cuncurènt. Sétma série) 'l è 'n film grutésc dal 2001 ad Daniel Minahan preśentâ a 'l Sundance film festival dal stés an.

La culòna sunóra dal film l'è stada fata p'r al grup indipendènt americàṅ di Girls Against Boys ma dènt'r a s cata anc al braṅ “Love Will Tear Us Apart” di Joy Division.

Sunt

La televiśiòṅ americàna l'è drē a preparàr la sétma edisiòṅ dal reality show ad sucès “The Contenders” in dua siē persunàǵ sarnî a caś cun na lutarìa i gh'aṅ da cupàr-as 'l un cun c'l àtar e 'l ùltim ch'a gh armàgn 'l è 'l vinsidōr. A n gh'è pròpria briśa la manéra ad rifiutàr-'s ad śugàr e sōl chi è bòṅ ad vìnsar tri edisiòṅ ad fila al pōl èsar lasâ in paś. I cuncurènt i gh'aṅ di cameramen ch'i n gh staṅ mai sù d'adòs e i gh'aṅ da cuntàr qvél ch'i pénsan durànt al śōg in manéra ch'al pùblic al sàppia sèmp'r incòsa. La prudusiòṅ la dà na pistòla a tut ma naturalmènt al règhli i dìśan ch'i cuncurènt i pōlan cumpràr-as tut qvél ch'a gh vōl s'i al vōlan, a gh mancarév àtar!

La campiunésa in carga l'è la Dawn Lagarto (Brooke Smith) ch'l'à vins la quìnta e la sésta edisiòṅ ma ch'adès la gh'à d'avér un putèṅ esénd lē a 'l utàṿ méś. La traśmisiòṅ l'è fata in dla sità in du la stà, Newbury in dal Connecticut. Al surtéǵ l'à stablî ch'i àtar sinc cuntendènt i èṅ:

Al spetàc'l al taca c'n un sunt dla série precedènta in dua la Dawn la vins cupànd òṅ in un negòsi, pò a s fà dabòṅ. La Lindsay la và a cà ad Franklin par cupàr-al ma a n mōr ninsòṅ, sōl la ragàsa la s bèca na sćiuptàda in dal bras. In cal mént'r Anthony al próa a scapàr via cun la sò putìna ma al n pōl mia, al règhli i èṅ ciàri. Al s fà mâł e al finìs a 'l uśdàł in dua i rìvan subìt la Connie e la Dawn ma l'è la prima dal dū a far-al fóra cun n'ignesiòṅ ad vlèṅ. Cl'atra la riva tard e la 'l cata bèla mòrt cun davśèṅ sò mujér in làgarmi. La dóna arliàda la dmanda acsè a i cameramen ad lasàr-la in paś p'r un pôc par la privacy.

A 'l impruvìś i cuncurènt i ricév'n un bijét in dua a s dà apuntamènt in di scantinâ 'd un sèntar cumersiàł p'r avér 'n ajùt par tiràr-as fóra da 'l śōg. I prim a rivàr i èṅ Franklin e la Lindsay. La sicurésa la pòrta via la pistòla a 'l vèć ma la ragàsa la diś che lē la fà part dal prugràma “The Contenders” e alóra i gh la làsan. L'è però na sudisfasiòṅ da pôc parchè Franklin al gh salta adòs e al la masa 'd bòti mént'r i genitōr dla śōvna i véd'n incòsa. Ma anc al pensiunâ al gh lasa 'l péni parchè al vèṅ cupâ da la puta ch'l'iva traplâ lē al tragatèṅ di bijét e pò la và in céśa a pargàr.

Subìt dòp la Dawn la tîṅ adrē a l'infarméra e la la bèca in dla sò cà ma pò par lē a taca 'l travàj e la Connie l'è custréta acsè a dar-ag na maṅ anc se malvluntéra. A 'l uśdał la dóna la dà a la luś na putìna ma la gh vèṅ tòlta subìt parchè i cuncurènt i gh'aṅ da tgnir adrē sōl a 'l śōg. L'infarméra l'è prònta par 'n àtar tratamènt a 'l vlèṅ ma Jeffrey, ch'a s cata là par dal curi e ch'l iva dit a la sò èx 'd èsar fnòć dmandànd-'g anc ad cupàr-al p'r a n patìr piò, al gh tira 'n cōlp ad pistòla parchè adès 'l à cambiâ idéa e al vōl vìvar.

Jeffrey e la Dawn, i ùltim dū cuncurènt in gara, i decìdan ad far un duèl in un camp da football ma pò i s arvòltan cun la prudusiòṅ cupànd i cameramen cun la dóna ch'la vōl indrē la sò putìna. Al canàł televiśìṿ al diś a i spetadōr ch'a gh'è stâ di prubléma tècnic e al cuntìnua 'l prugràma druànd di atōr ch'i gh sumìlian.

Culegamènt estéran