Ciao ma'...

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Ciao ma'...
Ciao mà.png
Vasco Rossi in na figùra dal film
Ciào ma'...
1988
Regìa: Giandomenico Curi
Scritōr: Roberto D'Agostino • Fiorenzo Senese
Atōr: Claudia GeriniMarco LeonardiGuido Elmi
Vasco RossiLoredana RomitoLorenzo Flaherty
Valerio AndreiMauro CarliSebastiano Somma
Müsica: Vasco Rossi
Léngua: Itagliàṅ
Dürä dal film: 93 minüt
Nasiōṅ: Itàglia


«
Róma l'è in fermènt p'r al cuncèrt dal sécul: Vasco Rossi al preśénta 'l àlbum „A gh'è qualchidòṅ ch'al diś ad nò“.»
(Tagline dal film)


Ciao ma'... (Ciào ma'...) l'è na cumèdia itagliàna dal 1988 ad Giandomenico Curi, muśicarèl dedicâ a 'l canti 'd Vasco Rossi.

In dla culòna sunòra dal film, impinìda 'd pès dal rocker ad Zòca cuma Vivere una favola, Albachiara, C'è chi dice no, Una canzone per te, Non mi va e Bollicine, a gh'è anc di braṅ an Utànta dla Samantha Fox (I Surrender (To The Spirit Of The Night)), ad Billy Idol (To Be A Lover), dla Jill Jones (Mia bocca), ad Boy George (Keep Me In Mind) e di Beastie Boys (Time to Get Ill).

Sunt

Vasco Rossi (Vasco Rossi) 'l è a Róma p'r un cuncèrt dal C'è chi dice no Tour e i śōvan dla capitàł i farév'n incòsa p'r ès'r-ag.

Paolo (Marco Leonardi) al ruba 'l pass a 'n giurnalìsta fnòć (Loris Loddi) ma 'l vîṅ bcâ subìt da qvéi dal servìsi 'd sicurésa. La Roberta (Silvia Ramenghi) la gh vrév andàr c'n un ragàs cgnusû a 'l parc, Cristiano (Lorenzo Flaherty), ma la sò amìga Gloria (Claudia Gerini) la gh al vōl fargàr dgénd a i suo ch'l'è stada rimandàda a scōla in dū matèri. La Cinzia (Sonia Cameriere) la lavóra in un negòsi 'd vistî, la créd 'd èsar na bèla figa, l'è na fan sfegatàda dal Blasco e d'l atōr Sebastiano Somma (Sebastiano Somma) e la n è minga tant gustóśa c'n i sò cliènt. La gh'à dū bijét p'r al cuncèrt ma la n cata gnanc un ragàs dispòst a 'ndàr sèg. Nico (Valerio Andrei) 'l è burióś e 'l pénsa sōl a far-'s i mùscui e 'l śburòṅ cun tut. Insém a 'l sò amìg Gepy (Antonio Degli Schiavi) 'l intórta dū ragasōli da purtàr a 'l spetàcul ma qualchidòṅ al gh fà 'n schèrs vudànd al serbatòj d'l òli dla sò mòta par lasàr-'l a pē. Sò fradèl Massimo, anc s'a gh piàś la mùśica clàsica, al decìd 'd andàr a 'l cuncèrt insém a la Patrizia (Laurentina Guidotti) ch'la gh'à 'l magòṅ parchè l'è péna stada mulàda da Nico.

Finî al show ad Vasco, fra i ragàs a scròca la mòla d'l amōr.

Culegamènt estéran