Cēşa ed Sân Zvân Vangelésta (Rèz)

C'l artìcul chè 'l è scrit in Arzân

La cēşa ed Sân Zvân Vangelésta (chiesa di San Giovanni Evagelista in italiân) cngusûda ânca cme Sân Zvanèin (San Giovannino in italiân) l'é un stâbil religiôş in piâsa Sân Zvân, int al cèinter stôrich ed Rèz.

Stôria

Al prémi nutési ed la cēşa în dal XII sècol, ânca s' ed còli ed l'impalcadûra uriginêla fîn a nuêter an n'é rivê gnînt. L'é stêda arfâta int al 1545 e, int al sècol dôp, piturêda da j artésta che srân pó impgnê int al cantēr ed la Başélica 'd la Madòna 'd la Gêra.

Spiegasiòun

La facêda in côt, an n'é mia finîda, mèinter la nécia ch' al la dôba, in dó dèinter a gh' é al muşàich ed Sânt'Antòni da Pâdva, lé dal 1956. La cēşa la presèinta 'na navêda sōl. Int la vôlta ch' l' unés la cópla cun la pôrta principêla a gh'é piturê in sté ōrdin: "Al batûdi dal demòni" (Le scofitte del demonio in italiân), "Sân Zvân e Dio" e "Vişiòun ed Sân Zvân". Tót j afrèsch, ôvri dal Franchi, în datê 1613, mèinter al bèli vésti ch' ingânen în dal bresiân Sandrîni. La cópla, cun quâter fnestròun e 'd etertânti stâtvi in teracôta, l' é stêda piturêda da Sisto Badalocchio ch' al gh'à rapreşentê al "Ritōren ed Crést" L'artésta l'à trât liberamèint l'inspirasiòun da "l'Asensiòun" piturêda dal Curèz int la cêşa ed Sân Zvân int la "só" Pèrma. În sèimper dal Badalocchio al quâter Virtó cardinêli preşèinti in i pnâc e al j âquili preşèint atâch a i fnestròun. Int al başlôt dal côro a gh'é l'afrèsch "la Risuresiòun" ed Guidotti ed Lóca. Al quêder centrêl dal cōro, aséja "la Depoşisiòun" l'é la côpia dal quêder cun l'istès nòm ed Daniele da Volterra preşèint int la cēşa rumâna ed Trinitê di Mûnt. A i lê dal preşbitèri a gh' é dô grōsi tèili, al "Mirâchel ed Sân Zvân" e al "Trânşit ed Sân Zvân" tóti dō dal 1614, ôvri dal bulgnèiş Tiarini.

Elèinch di léber

Ferdinando Fabbi, Guida di Reggio nell'Emilia-Città del Tricolore, Reggio nell'Emilia, 1962

Nôta: cla pâgina ché l'é stêda inviêda cun 'na tradusiòun da Chiesa di San Giovanni Evangelista (Reggio Emilia) trâta da it.wikipedia.org.
Guêrda la stôria ed la pâgina uriginêla per cgnòser l'elèinch 'd j autōr.