Butter

Da Wikipedia.

C'l artìcul chè 'l è scrit in Miranduléś Emiliàn

Butter
Butter

La Garner, Jackman e la Shahidi in na figùra dal film
Butér
2011
Regìa: Jim Field Smith
Scritōr: Jason A. Micallef
Atōr: Jennifer GarnerTy BurrellOlivia Wilde
Hugh JackmanAlicia SilverstoneRob Corddry
Yara ShahidiAshley GreeneKristen Schaal
Phyllis SmithGarrett SchenckDodie Brown
Müsica: Mateo Messina
Léngua: Ingléś
Dürä dal film: 90 minüt
Nasiōṅ: Stat Unî


«
Culesterōl élt, murâł basa.»
(Tagline dal film)


Butter (Butér) l'è na cumèdia dal 2011 ad Jim Field Smith giràda in Luiśiàna.

L'à fat sù sentsìnc-mila dòlar a 'l incìrca e l'è stada preśentàda a 'l Fèstival internasiunàł dal cìnema ad Turònt.

Sunt

La Destiny (Yara Shahidi) l'è na putìna òrfna ad culōr ad déś an che dòp soquànt afidamènt andâ mâł la và a vìvar cun Ethan Emmet (Rob Corddry) e sò mujér Julie (Alicia Silverstone) ch'la n pōl minga avér fiōl. Durànt na vìśita a la „Féra dal stat d'l Iowa“ la finìs a védar la statṿa 'd butér dal Graal Sàcar ad Bob Pickler (Ty Burrell), 'n artìsta che fiṅ da pìcul 'l à sèmpar fat dal creasiòṅ cun cal lavōr lè. La baghéta la finìs dimóndi bèṅ un bicér a la sò manéra faghénd védar 'd èsar purtàda par 'l art.

Bob al gh'à na fiōla 'n pôc arvèrsa, la Kaitlen (Ashley Greene), abùda prima 'd spuśàr la Laura (Jennifer Garner), na dóna sénsa cōr ch'la pénsa sōl a 'l sucès. Quànd al giùdas Orval Flanagan (Garrett Schenck) al śibìs a sò marè ad dar-'g un taj dòp quìnd'ś an ad sucès e ad pasàr la maṅ a di àtar, lē, ch'la 'l vdiva bèṅ in futûr cuma sìndig e cuma guvernadōr, la s incàsa 'd brut e la n céd minga vlénd purtàr avànti la tradisiòṅ da par lē. La s iscrìv dònca a na gara 'd statṿi 'd butér ma la gh'à da cumbàtar cun la Carol Ann Stevenson (Kristen Schaal), na bruta figa ch'l'à sèmpar tgnû adrē a 'l móstri ad Bob, cun la Brooke (Olivia Wilde), na putàna ch'la vansàva siesènt dòlar da sò marè par na gusàda in màchina minga finìda par cólpa dla Laura ch'la gh'éra andàda adòs apòsta par l'arlìa, e cun la Destiny in parsòna. A vìnsar l'è pròpria la putìna ma la Laura la n gh la cava pròpria minga a mandàr śò 'l ròsp.

La dóna la decìd acsè 'd andàr a catàr 'n sò vèć muróś da i tèmp dla scóla ch'adès al vénd dal màchini, Boyd Bolton (Hugh Jackman), par far-as jutàr. La s fà anc gusàr ma in cambi la vōl che lò al vaga a dir a i giùdas che Ethan al gh'à dâ di bèsi par jutàr la putìna, dònca la gara l'è da 'rfàr ad nóṿ. Boyd al gh'astà anc parchè al gudiōł 'l è stâ dimóndi, l'éra tant strica ch'a parìva ch'la n l'is piò druàda da vint an.

Anc a frònt dna bala acsè grôsa, 'l óm al gh'à abû da lèś'r al dascórs da 'n fujét lugâ sóta 'l sò capèl da cowboy da 'l tant ch'l è minciòṅ, la Destiny la decìd ch'a n gh'è mia prubléma, lē l'è prònta par la próa.

Culegamènt estéran