Burdó

Da Wikipedia.
C'l artìcul chè 'l è scrit in Miranduléś Emiliàn
Al stéma dla sità
La sità ad Burdó sgnàda in sla mapa
Al Teàtar Grand dal Setsènt
Al palàs dla bórsa e la Garóna


Burdó (Bordeaux in Francéś, a s lèś [bɔʁˈdo]) l'è na sità dal sud-òvest dla Frància ad duśènt-quarànt'òṅ-mila abitànt, la nòna dal paéś, ch'la s cata in dal dipartimènt dla Girónda in dla regiòṅ dl'Achitàgna. 'L è 'n pòrt impurtànt in s'l Atlàntic parchè la dasfrùta bèṅ al fiùm Garóna ch'a gh pasa in mèś. La sò àrea metrupulitàna l'è la quàrta più granda dla repùblica miténd insém un migliòṅ e dū 'd abitànt.

Al sò mòt, in latìn, 'l è „LILIA SOLA REGVNT LVNAM, VNDAS, CASTRA, LEONEM“ ch'a vōl dir «I śii, da par lōr, i tìnan sù la Luna, gl'óndi, al castèl e al lèòṅ». L'è divìśa in òt quartēr e sinc cantòṅ (da 'l 2015, pima i ér'n òt) e 'l sò clima 'l è qvél atlàntic. In dal 1154 l'è dvintàda na sità ingléśa, par matrimòni ad dū curóni, e la l'è armàśa par tri sécui.

La sità, tiràda sù in dal tèrs sècul prima 'd Crist, l'è famóśa p'r al sò vèṅ, al Burdó, ch'al dà anc al nóm a 'n culōr misć fra 'l maròṅ e 'l vióla, e anc p'r al sò sèntar stòrig, fat da 347 edifìsi, dvintâ patrimòni mundiàł dl'umanità in dal 2007 par qvéi d'l UNESCO.

Al 91,2% di burdunéś i èṅ impgnâ in dal tersiàri, sōl al 4,7% al lavóra in dl'indùstria (al màchini dla Ford e 'l gumi dla Michelin) e al 3,8% in dal custrusiòṅ. In sità a gh'è anc un caśinò (in dal quartēr Bordeaux-Lac). I turìsta i èṅ dū migliòṅ è mèś 'l an a 'l incìrca.

Al sò sìndig, da 'l 2014, 'l è 'l republicàṅ Alain Juppé, èx prim minìstar dla Frància.

Persunàǵ famóś ligâ a Burdó

Culegamènt estéran

Àtar prugèt