Bucky Larson: Born to Be a Star

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Bucky Larson: Born to Be a Star
Bucky Larson Born to Be a Star.png
La Ricci e Swardson in na figùra dal film
Bucky Larson: Nâ p'r èsar na stéla
2011
Regìa: Tom Brady
Scritōr: Adam Sandler • Allen Covert • Nick Swardson
Atōr: Nick SwardsonChristina RicciIdo Mosseri
Don JohnsonStephen DorffKevin Nealon
Nicholas TurturroMiriam FlynnMario Joyner
Brandon HardestyOwen BenjaminTyler Spindel
Müsica: Waddy Wachtel
Léngua: Ingléś
Dürä dal film: 97 minüt
Nasiōṅ: Stat Unî


«
A n gh'è minga di atōr pìcui, sōl dal parti pìculi.»
(Tagline dal film)


Bucky Larson: Born to Be a Star (Bucky Larson: Nâ p'r èsar na stéla) l'è na cumèdia vulgaròta americàna dal 2011 ad Tom Brady, numinàda a sinc Razzie Awards.

Cl'òpra chè, prudóta p'r Adam Sandler, l'è custàda nóṿ migliòṅ ad dòlar e la 'n à pò muciâ sù sōl dū e mèś.

Sunt

Bucky Larson (Nick Swardson) 'l è 'n bambusòṅ dimóndi biólc c'n un sarvèl da galìna, di dènt da cunèṅ, 'n asènt pēś dal Midwest e na patnàda a scudlòt. Anc s'l è bèla grand al viṿ incóra c'n i sò genitōr, Jeremiah (Edward Herrmann) e la Debbie (Miriam Flynn), in na cà in dla campàggna in dal nòrd d'l Iowa, in mèś a di camp ad furmintòṅ. Dòp avēr pardû 'l lavōr da cumés in un supermarcâ, parchè al s éra mis a spataglàr cun na vècia pardénd dal tèmp, i sò amìg i al ciàm'n a véd'r un film pòran da lōr par tiràr-al sù faghénd-as dal pugnéti insém, un quèl che Bucky però al n s è mai fat. Quànd a partìs al filmâ, na pelìcula di an Stanta, a salta fóra ch'i dū prutagunìsta i éran pròpria i sò genitōr ch'i druàv'n i nóm 'd art ad Rosie Bèl Cespùli e Jim Super-Spric.

Al ragàs al s mét in tèsta ad far cumpàgn di suo e 'l partìs p'r Hollywood par dvintàr 'n as in dal mónd di film spurcaciòṅ. Rivâ in Califòrgna al s fà amìg cun na camaréra ciamàda Kathy (Christina Ricci) ch'la lavóra in dal risturànt ad Tony (Nicholas Turturro) ch'al gh dà sèmp'r adòs cumpàgn a la sò culéga Marge (Mary Pat Gleason). Dòp avēr tòlt in afìt na cambra da 'n tisi minga tant gustóś ch'al stà in dal palàs dla Kathy, Gary (Kevin Nealon), Bucky al và a far un pruvèṅ da 'n regìsta 'd reclàm, Claudio (Mario Joyner), ch'l al manda a na fèsta 'd un sò culéga di film a luś rósa, Randy Dooley (Stephen Dorff) dit Dick Shadow par via dl'òra ch'la fà 'l sò uśèl. Quànd Bucky 'l è là, e 'l al tira fóra par far-al védar, Dick al gh fà far na bruta figùra davànti a tut parchè 'l sò cas 'l è pròpria piculèṅ.

Bucky al taca a lauràr c'n un regìsta in daśgràsia, Miles Deep (Don Johnson), e c'n al sò asistènt sò anvōd Jimmy (Tyler Spindel) ma durànt la prima séna, quànd la sò partner Gretchen (Dana Goodman) la s cava via la maja faghénd véd'r al regipèt, chi lò al śbòra subìt par dū vòlti, sénsa gnanc gusàr. Al vìddeo, cargâ cuma 'n scart su 'l sit YouPube, al gh'à 'n sucès clamuróś.

Culegamènt estéran