Blade (film)

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Blade
Blade
Blade (film).png
Wesley Snipes in na figùra dal film
id.
1998
Regia: Stephen Norrington
Scritùr: Marv Wolfman
Gene Colan • David S. Goyer
Atùr: Wesley SnipesStephen DorffUdo Kier
Donal LogueKris KristoffersonArly Jover
N'Bushe WrightTraci LordsEric Edwards
Müsica: Mark Isham
Lengua: Ingléś
Dürä dal film: 120 minüt
Nasiòṅ: Stat Unî


«
I putēr 'd 'n èsar ch'al viṿ in etéran. L'anma 'd 'n ès'r umàṅ. Al cōr 'd 'n eróe.»
(Tagline dal film)


Blade (id.) 'l è 'n film fantàstic americàṅ dal 1998 ad Stephen Norrington trat da 'l persunàǵ di fumét dla Marvel Comics creâ par Marv Wolfman e par Gene Colan. In dla part dla Racquel a gh'è l'èx atōra ad film pòran Traci Lords.

Custâ quarànta migliòṅ ad dòlar, al film al 'n à pò purtâ a cà da piò ad sènt-trént'òṅ. Al gh'à abû dū séguit, Blade II in dal 2002 e Blade: Trinity in dal 2004.

Sunt

In di an Ssanta na dóna 'd culōr la parturìs al sò putèṅ ma la mōr p'r un śbóc ad sangṿ. Chi lò 'l è Eric Brooks (Wesley Snipes). Dvintâ grand, c'n al scutmàj 'd “Al Diùran”, lì lò tut vistî ad nég'r e cun di uciài da sōl adòs al taca na batàja sénsa quartēr c'n i vampîr. Dòp na lòta cun chi èsar lè in na discutéca al bruśa 'l còrp ad Quinn (Donal Logue), òṅ ch'al lavóra p'r al sò nemìg più catìṿ ch'a sa gh sia, al Diàcun Frost (Stephen Dorff).

Quinn però al n è mia mòrt. Purtâ a 'l uśdàł p'r ès'r eśaminâ, al masa 'n mèdag e pò al mòrśga la dutōra Karen Jenson (N'Bushe Wright). La pulisìa la dà adòs a Blade ma chi lò al gh la cava a scapàr via dòp avér tajâ via na maṅ a Quinn e purtâ sèg la dóna ch'la gh arcòrda sò màdar. Rivâ a la sò baś, al sò jutànt e insgnànt Abraham Whistler (Kris Kristofferson) al gh dà na cura par far-la guarìr méntar Blade, mèś óm e mèś vampîr, al gh'à sèmpar da far dal puntùri par reśìst'r a la sē 'd sangṿ.

Da n'atra banda, in dla “House of Erebus”, al cunsìli di vampîr, Lord Dragonetti (Udo Kier) al s la tōś c'n al Diàcun Frost parchè 'l è 'n ciùcia-sangṿ dvintâ e minga nâ cuma lò.

Culegamènt estéran