Bataclan

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Inaugurasiòṅ dal Ba-Ta-Clan in dal 1865


Al Bataclan 'l è 'n teàtar par spetàcui ad Parì ch'al s cata in dal quartēr XI. 'L è stâ tirâ sù in dal 1864 su 'n prugèt d'l architét Charles Duval e al tóś al sò nóm da na cumèdia muśicàla ambintàda in Cina scrita par Jacques Offenbach, Ba-ta-clan, purtàda a teàt'r in dal 1855. Al sò stîl architetònig 'l arcòrda pròpria 'n edifìsi cinéś anc s'adès, dòp tant an, al palàs 'l à pardû al téǵ uriginàri.

Al sò indirìs 'l è „50, Bd Voltaire 75011“ e al pōl tgnir dèntar mila e sinc-sènt parsòni a 'l incìrca.

'L 11 ad Mars dal 1991 al Bataclan 'l è dvintâ 'n munumènt stòrig, arcgnusû par la léǵ francéśa.

Stòria

Al Bataclan tòlt śò in dal 2008
Màchini dla pulisìa davśèṅ a 'l Bataclan al dè dòp 'l atintâ dal 2015

Al palàs 'l è stâ inaugurâ al 3 ad Favràr dal 1865 cuma cafè-cuncèrt. I mur ad fóra i éran durâ e impinî 'd statṿi ad Dio e ad dragòṅ cinéś. A 'l prim piàṅ a gh'éra na sala da bal. Dòp al 1910 al Bataclan 'l à tacâ a far di spetàcui dla rivìsta ch'i gh'aṅ abû anc un sèrt sucès.

In dal 1926 'l edifìsi 'l è dvintâ 'n cìnema ma pò in dal 1933 'l è andâ a fōg pardénd al téǵ uriginàri. In dal 1950 soquànti sò parti i èṅ stadi tiràdi śò p'r al nòrmi su la sicurésa 'd in alóra. In dal 1969 al cìnema 'l à sarâ par lasàr spasi incóra a na sala par spetàcui.

A 'l dè 'd incō al Bataclan al gh'à 'n prugràma dimóndi vari e misć dand spasi a di cuncèrt rock e pop, a di spetàcui còmig, siri disco e ad teàtar. I mur estér'n i èṅ stâ piturâ cuma na vòlta.

Al 13 ad Nuvémbar dal 2015, durànt un cuncèrt pîṅ stóp dal grup americàṅ Eagles of Death Metal, prima ad tri dè dedicâ a i Deftones, a gh'è stâ 'n atintâ ad tri terurìsta ch'i aṅ cupâ a sćiuptàdi almànc utànta-nóṿ parsòni, dagnóra tuti śōvni, e frénd-an da piò ad sènt. Dū ad qvist chè i s èṅ pò tòlt la vita faghénd-as saltàr p'r ària méntar c'l àtar 'l è stâ masâ par la pulisìa. 'L atintâ 'l è pò stâ rivendicâ da qvéi dal Stat Iślàmic.

Al Bataclan 'l iva bèla abû dal minàsi in dal 2007 e in dal 2008 parchè 'l iva dâ spasi a soquànti cunferénsi 'd urganiśasiòṅ ebrèj.

Culegamènt estéran