Badànt
|
C'l artìcol chè 'l è scrit in
Carpśàn |
La badànta o anc, mo meno despès, al badànt òm (badante in itagliàṅ), l'è na lavoradóra ch'la despègna al só mistēr tgnènd adrē a dal persòuni despès ansiàni o minga tant bòuni a fèr i lavōr, persòuni ch'i gh'vinen cunsgnèdi dai só parèint, da badèregh ch'i n's faghen dal mêl, ch'i staghen a 'l sicûr e curê, tgnû anc pulî e in cumpagnìa sēg.
Tgnènd adrē a dal persòuni acsè mìa tant indipendèinti, el badànti al più del volti, i gh'àn da stèr in cà sēg, aiutèr i ansiàṅ a despgnèr i fât ed cà, cumpagnèr-i fóra a tōr edl'ària, badèr ch'i staghen bèin e argiulî e in sicurèsa.
L'asunsiòun di badànt
Al só cuntrât ed lavōr al mèt pèra al badànt col lavoradōr domèstic, e cuma queschè, al gh'dà dirìt ai dè 'd permès, ed féri, ala "tredicéśma" e a 'l TFR. Quand 'n ansiàn al n'è pròpia mia avtosuficìnt, ch'al gh'arà biśògn 'd asistèinsa tùti el 24 óri dla giurnèda, dòunca a s gh'arà da considerèr ed śuntèr n'ètra badànta alméno part-time ch'la cuacìs chegli óri che cl'ètra badànta l'è vìa 'd cà.
Soquànt risć dal mistēr
Send che i agìnt ch'i gh'àn biśògn edl'asistèinsa dla badànta, despès i nn'ìn briśa tant śgalvî e dal volti gnanc bòun ed lamintères, a s cata al risć che la badànta la s in prufìta, ch'la cata la manéra, s'la nn'è minga tant onèsta, ed trascurèri, 'd an lavurèr minga bèin in dl'asistèinsa ch'la gh'duvrèv prestèr ség. In di chèś più mledèt, a gh'è 'l risć che la badànta la gh'ròba in cà, ch'la gh'śgranfègna i só bèin per purtèrghi vìa. A n's è mai guardê abàsta, cun i agìnt ch'a s porta dèintr in cà...
Vóś lighèdi
Èter progêt
Wikizionario contiene la voce di dizionario «Badànt»
