Alexandria Ocasio-Cortez

C'l artìcul chè 'l è scrit in Miranduléś

L’Alexandria Ocasio-Cortez (New York, 13 'd Utóbar dal 1989, a s lèś /æləɡˈzændɹiə oʊˌkɑsioʊ kɔɹˈtɛz/ in ingléś), cgnusùda anc cun 'l acrònim AOC, l'è na pulìtica americàna dal partî demucràtic, la parlamentàra più śōvna dla stòria di Stat Unî esénd stada elèta a vint-nóṿ an a la Cambra di Rapreśentànt in dal distrét n.14 dal Stat ad New York.

L'è n'espunènta dla curènt 'd sinìstra dal sò partî, i sucialìsta demucràtic, esénd ch'la s bat par na sanità par tut (Medicare), par n'università pùblica a gràtis, p'r al salàri mìnim, par scanślàr al parśòṅ tgnudi da di privâ, par na regulamintasiòṅ dgl'armi da fōg, par tasàr fòrt la quóta di rèdit ch'i pàs'n i déś migliòṅ ad dòlar 'l an, par dar la sitadinànsa a gl'imigrâ iregulàr e p'r al śvilùp dn'ecunumìa vérda.

La gh'à 'n asteròid dla fasa prinsipàla ch'al pòrta 'l sò nóm: al 23238 Ocasio-Cortez.

Biugrafìa

La Ocasio-Cortez l'è nada in dal quartēr dal Bronx da 'n pàd'r architét, Sergio, e na màdar ch'la daśvgnìva da Pòrt Ric, la Blanca. La gh'à 'n fradèl più pìcul ciamâ Gabriel.

Durànt al secónd an di studi a l'università 'd Boston la patìs al dulōr dla mòrt ad sò pàdar p'r un càncar a i palmòṅ ch'la dà inìsi a na batàja par tgnir strica la sò cà parchè lò 'l éra mòrt sénsa far testamènt. Par far in manéra ch'i n gh la purtìsan minga via, ch'la gh'iva n'iputéca insìma, dòp la làurea in relasiòṅ internasiunàli e ecunumìa l'è custréta a lauràr da barìsta e camaréra par purtàr di bèsi in cà. In chi an lè la lavóra anc p'r al senadōr Ted Kennedy.

In dal 2016 la decìd ad mét'r-as da la banda 'd Bernie Sanders ch'l iva sfidâ l'Hillary Clinton par la nomination dal partî demucràtic par gl'elesiòṅ presidensiàli americàni dal 2016. Dū an dòp l’Alexandria la vins al primàri dal sò partî cónt'r al sentrìsta Joseph Crowley par cùrar in dal 14śum distrét dal Stat ad New York, spindénd in dla campàggna eleturàla sōl 194 mila dòlar cónt'r i tri migliòṅ e quàtar dal sò rivàł. Al dè dgl'elesiòṅ ad mità mandâ dal 2018 p'r un pòst a 'l cungrès la spasa pò via al republicàṅ Anthony Pappas c'n al 78,2% di vōt cónt'r al 13,6%.

Culegamènt estéran

(EN) Al sò sit ufisiàł

Àtar prugèt

Wikiquote contiene citazioni di o su Alexandria Ocasio-Cortez
Wikimedia Commons contiene file multimediali su Alexandria Ocasio-Cortez