Al centro dell'uragano (film 1956)
|
C'l artìcul chè 'l è scrit in
Miranduléś |
 Storm Center
| ||
| Al centro dell'uragano | ||
 La Bette Davis in na figùra dal film | ||
| A 'l sèntar d'l uragàṅ 1956 | ||
|---|---|---|
| Regìa: Daniel Taradash | ||
| Scritōr: Daniel Taradash • Elick Moll | ||
| Atōr: Bette Davis • Brian Keith • Kevin Coughlin Paul Kelly • Edward Platt • Michael Raffetto Sally Brophy • Howard Wierum • Kim Hunter Curtis Cooksey • Joseph Kearns • Joe Mantell | ||
| Müsica: George Duning | ||
| Léngua: Ingléś | ||
| Dürä dal film: 85 minüt | ||
| Nasiōṅ: Stat Unî | ||
Al centro dell'uragano (A 'l sèntar d'l uragàṅ) 'l è 'n film dramàtic in biànc e négar dal 1956 ad Daniel Taradash, prima òpra cónt'r al Macartìśum fata a Hollywood. 'L à vins al Prix de Chevalier da la Barre durànt al 10im Fèstival ad Cannes.
La pelìcula la gh'iva da èsar giràda a gl'inìsi di an Sinquànta da Stanley Kramer cun prutagunìsta la Mary Pickford e pò la Barbara Stanwyck quànd la prima l'à bandunâ 'l prugèt par dal presiòṅ pulìtighi a dita 'd Taradash ch'l iva firmâ la senegiadùra. A la fiṅ, quànd anc Kramer al s è tirâ indrē parchè al s éra quistiunâ cun qvéi dla Columbia Pictures, al film 'l è stâ girâ da Taradash stés cun la Bette Davis in dla part dl’Alicia.
Sunt
A Kenport, un paiśèṅ dla pruìnsa di Stat Unî, la bibliutéca pùblica l'è purtàda avànti da l’Alicia Hull (Bette Davis) dòp che sò marè 'l è mòrt in Frància durànt la prima guèra mundiàla. Chi lē la gh tîṅ dimóndi a 'l sò lavōr, specialmènt a tgnir adrē a i baghét ch'i gh'aṅ la pasiòṅ dal lèśar cuma Freddie Slater (Kevin Coughlin) ch'al pasa dimóndi tèmp su i lìb'r invéci ch'andàr a śugàr a baseball o a far a casòt cum a vrév invéci sò pàdar George (Joe Mantell) cunsiderànd ch'l è 'n fiōl masć.
La bibliutecàra la dmanda a 'l cunsìli cumunàł ad psēr ślargàr 'l edifìsi p'r avēr na sala dedicàda a i putèṅ. Al prugèt al piàś dimóndi a i pulìtig ma a gh'è sōl un fat: prima la gh'à da tiràr via da i scafài e in présia un lìbar intitulâ „Al sógn cumunìsta“, un tèst minga patriòtic a dita lōr. La dóna la n gh pénsa gnanc luntanamènt a far-al, minga parchè la sia 'd acòrd cun qvél ch'a gh'è scrit dèntar ma parchè la cultùra la gh'à biśógn ad far sintìr tut al vóś, far giràr gl'idéi acsè la gint la s pōl far 'n upiniòṅ, saénd. 'L è lśénd al Mein Kampf 'd Adolf Hitler ch'al mónd 'l à capî la matèria dal naśìśum e 'l à psû cumbàt'r-al.
L’Alicia Hull la la paga cara parchè difendénd i sò prinsìpi la finìs p'r èsar licensiàda, tgnénd anc cònt ch'in pasâ l'è stada iscrìta a soquànti asuciasiòṅ ad sinìstra e dònca l'è fàcil ch'la n sia minga tant na patriòta. La gestiòṅ dla bibliutéca la vîṅ dada a la sò vice, la Martha Lockridge (Kim Hunter), muróśa 'd 'n avucàt ambisióś ch'al vrév dasfrutàr cal clima lè 'd òdi par far caréra in pulìtica, Paul Duncan (Brian Keith).
Quànd l’Alicia Hull la s rénd cònt che tut in paéś i la pàran via e i gh dànan cóntar la decìd 'd andàr a star via da na sò surèla in Califòrgna. Qvél ch'a gh fà più mâł 'l è sintìr 'l òdi di sò putèṅ ch'a fòrsa 'd scultàr di brut quèi su 'd lē da i genitōr i n la vōlan più véd'r o far dū ciàcri sèg. Freddie specialmènt 'l è fóra 'd tèsta, arliâ e pîṅ 'd òdi al dà fōg a la bibliutéca.