Sérigrafìa

Da Wikipedia.
C'l artìcul chè 'l è scrit in Carpśàn Emiliàn
A:Inciòster viscōś • B:Racla u Spatla • C:Figùra ch'a s à da stampèr • D:Séda dal tlèr • E:Schérum u Tlèr u Sdàs serigràfic • F:Stampa apèina fàta: la racla la spèlma 'l inciòster in sìm'a la séda dal sdàs e la 'l fa pasèr ded sòta da mèś el só màj śbuśìdi, ch'al stàmpa la figùra ch'a s vōl


La Sérigrafìa l' è na manéra 'd stampèr un quèlch mutîv u dal scrìti in sìm'a na variétê dimòndi granda 'd materiē, fènd pasèr 'l inciòster a travèrs un sdàs (tlèr) strulghê apòsta, sènd śbuśî sól in dû a gh'à da gnîr la stàmpa dla scrìta u dal disègn.

Descrisiòun

Schēma dal pasàģ edl inciòster a travèrs el maj dla séda dal tlèr

Prìma 'd tùt 'l è fundamentêl al tlèr ed stàmpa serigràfica (al sdàs), che al dè d'incō al vìn preparê cun di sistéma dimòndi śvélt e precìś: da na pelìcula preparèda 'l piò dal vólti fènd stampèr un fòj trasparèint da 'n cumpùter, a s va a impresiunèr al tlèr preparê prìma cun na fotoemulsiòun, dìta anca 'śladèina', sinsìbla ala lûś; l'impresiòun fotogrâfica dla pelìcula in sìm'a la fotoemulsiòun ed sòta a na lûś, la s cumpôrta 'n pò cùma s'la cuśìs la śladèina atàc al tlèr sôl in dû a n'gh'è mìa la scrìta négra dal disègn ind la pelìcula. Cl'impresiòun chè 'l è quèl ch'a fa gnìr fòra, dòp un lavaģ a l'aqua, al tlèr finî, śbuśî sôl in dû a gh'à da pasèr 'l inciòster, pròunt p'r andèr a stampèr.

Dòp ch'a s è preparê al tlèr, a s pól finalmèint andèr in stampa, cun na racla (spatla) ch'la spèlma 'l inciòster dàintr'al tlèr e-cmandènd-egh ed pasèr sól a travèrs el maj dla séda c'n i spàsi lasê śbusì da la śladèina prima impresiunèda c'n al disègn.

L'inciòster al vin śò dal tlèr in sìm'a 'l materiêl ch' a vlòm stampèr cun la fôrma prìma impresiunèda in dal tlèr, al s egh pògia lè in sìma, pò a bsògna però anca sughér-el cun dal chèld u dl'aria 'sùta.

C'n i 'nciòster speciē ch'a gh'è al dè 'd incō, el stampi in serigrafìa i gh'àn dimòndi tgnùda, a la lûś, ai lavàģ, ai śgràfi, a 'l lavàģ c'n al prédi, e vìa discurènd.