La soldatessa alle grandi manovre

Da Wikipedia.

C'l artìcul chè 'l è scrit in Miranduléś Emiliàn

La soldatessa alle grandi manovre

L'Edwige Fenech e Lino Banfi in na figùra dal film
La suldàda a 'l manóvri grandi
1978
Regìa: Nando Cicero
Scritōr: Fiorenzo Fiorentini
Nando Cicero • Annie Albert
Atōr: Edwige FenechGianfranco D'Angelo
Michele GamminoLino BanfiAlvaro Vitali
Renzo MontagnaniLucio Montanaro
Müsica: Piero Umiliani
Léngua: ItagliàṅVènetNapulitàṅPugléś
Dürä dal film: 96 minüt
Nasiōṅ: ItàgliaFrància


La soldatessa alle grandi manovre (La suldàda a 'l manóvri grandi) l'è na cumèdia dal 1978 ad Nando Cicero, séguit ad La soldatessa alla visita militare d'l an prima.

Sunt

La dutōra Eva Marini (Edwige Fenech) la gh'à 'l incàr'g ad studiàr al cumpurtamènt sesuàl di militàr dal repàrt dal culunèl Fiaschetta (Renzo Montagnani), un sunàmbul ch'l arév vlû far 'l ustrètric e ch'al bala 'l flamenco vistî da dóna quànd ninsòṅ 'l al véd. Prima ad tacàr a tōr al miśùri e di campiòṅ biulògic di suldâ la fà dū ciàcri c'n al sàdig cmandànt mèdag (Gianfranco D'Angelo) e pò c'n i putèṅ pòv'r e patî 'd Don Pagnotta (Lino Banfi). Chi lò però 'l è 'n prevòstar piutòst inśgōrd parchè al magna tut al magnàr che la gint la gh lasa par limòśna da dar a i baghét.

Al suldâ Alvaro (Alvaro Vitali), in cal méntar, al và in paéś a pascàr da gusàr qualchidùna ma 'l dóni ch'a gh preśénta Salvatore (Lucio Montanaro) i èṅ bruti ch'i pìgan, la Leoparda (Rita Di Lernia), ciamàda acsè parchè l'è na mata cun dal maci 'd vèṅ in sla ghigna e ch'la vōl i masć sōl quànd a vîṅ al taramòt, e la Farfallina (Maria De Sisti), na budlòna ch'la vénd i giurnài e ch'l'à cupâ sò marè sénsa vlēr durménd-'g insìma. A gh sarév anc la Gesuina (Franco Caracciolo), la fiōla dal pruprietàri dl'ustarìa Calogero (Enzo Monteduro). Chi lò al gh'à fat mét'r al mudàndi 'd fèr par prutéś'r-la parchè l'è na malnéta patintàda e la s farév tut i suldâ, minga par gnint l'à śbuśî 'l mur dla cantìna par tgnir 'd òć i óm ch'i vàn'n a pisàr.

La dutōra la gh'à pò da tgnir adrē a 'n squasamarléti arcamndâ, Gianluca Capretti (Michele Gammino), che prima al fà finta 'd èsar malâ p'r armàgnar in na cambra da par lò sénsa far la vita dal suldâ, pò al próa a infnuciàr l’Eva faghénd finta 'd ès'r un fnòć ch'al gh'à bisógn 'd èsar curâ da na fémna par turnàr cuma prima. La strulgàda la funsiòna e la Marini la s inamóra dabòṅ e la finìs a lèt sèg mént'r al generàł Barattoli (Antonino Faà di Bruno) al vèra 'l us dla cambra parchè a gh scapa 'l caghét.

Culegamènt estéran