X-Men (film)
|
C'l artìcul chè 'l è scrit in
Miranduléś |
 X-Men | ||
.png) La Janssen, la Berry e Marsden in na figùra dal film | ||
| id. 2000 | ||
|---|---|---|
| Regìa: Bryan Singer | ||
| Scritōr: Tom DeSanto • Bryan Singer • David Hayter | ||
| Atōr: Patrick Stewart • Hugh Jackman • Halle Berry Ian McKellen • Famke Janssen • James Marsden Anna Paquin • Tyler Mane • Rebecca Romijn Ray Park • Bruce Davison • Matthew Sharp Brett Morris • Rhona Shekter • Shawn Roberts | ||
| Müsica: Michael Kamen | ||
| Léngua: Ingléś | ||
| Dürä dal film: 104 minüt | ||
| Nasiōṅ: Stat Unî • Cànada | ||
X-Men (id.) 'l è 'n film fantàstic americàṅ e canadéś dal 2000 ad Bryan Singer trat da i persunàǵ di fumét dla Marvel Comics creâ in dal 1963 par Stan Lee e par Jack Kirby.
Custâ stanta-sinc migliòṅ ad dòlar, al film al 'n à pò purtâ a cà dagnóra tarśènt.
Sunt
[mudéfica la surzéia]Al senadōr Robert Kelly (Bruce Davison) a Washington al vōl far pasàr na léǵ par la registrasiòṅ at tut i mutànt parchè a sò dita i èṅ periculóś p'r al gèn'r umàṅ e dònca a gh'è da schedàr-i e tgnir-i cuntrulâ.
Al prufesōr Charles Xavier (Patrick Stewart), un mutànt telèpat dimóndi putènt ch'al n è minga bòṅ ad giràr, al gh'à na scóla in du al juta di àtar mutànt a cgnósar e a druàr a 'l méj i sò putēr, dand-'g anc un pòst in du vìvar esénd ch'i èṅ da spés udiâ da la gint cumùna ch'la gh'à paùra 'd lōr. In d'l istitùt a gh'è anc la Jean Grey (Famke Janssen), na ragàsa ch'l'è bòna ad mōvar gl'ugèt c'n al pinsēr e ch'la gh fà da asistènta, al sò muróś Scott Summers (James Marsden), ch'al spara di raś da i òć e 'l è ciamâ Ciclôp parchè 'l è custrét a druàr di uciài speciài, e lʼOroro Munroe dita Timpèsta (Halle Berry), c'n al putēr ad cambiàr al tèmp atmusfèrig. Al sógn ad Charles 'l è qvél 'd un mónd in dua umàṅ e mutànt i pòsan vìv'r insém e in paś.
Un vèć amìg ad Xavier, 'l ebrèj Erik Lehnsherr (Ian McKellen) c'n al putēr dal magnetìśum e dònca cgnusû anc cuma Magneto, al la pénsa difarènt anc parchè da śōvan 'l è stâ mis in un camp ad stermìni in Pulògna, par lò i èṅ i mutànt ch'i gh'aṅ da cmandàr. I stànan da la sò banda di àtar mutànt cuma Sabretooth (Tyler Mane), na bistiàsa cun di dènt e dal grifi dimóndi śvilupàdi, la mutafórma Mìstica (Rebecca Romijn) e Toad (Ray Park), un ragàs dimóndi śvélt cun na linguàsa da ròsp impinìda 'd vlèṅ àcid.
Dòp ch'in dla scóla i èṅ rivâ da 'l Cànada àtar dū mémbar, la ragasōla Rogue (Anna Paquin), ch'la n pōl tucàr ninsòṅ sénsa fargàr-'g i putēr e i arcòrd, e Logan dit Wolverine (Hugh Jackman), un mutànt c'n al putēr ad guarìr in présia da tut i mâi e c'n un schéltar 'd adamànt impiantâ a 'l pòst di òs e dal grifi murtàli ch'i gh sàltar fóra da la maṅ, al scóntar fra 'l dū bandi 'd mutànt 'l è inevitàbil quànd Magneto al vōl druàr un machinàri par trasfurmàr tut gl'umàṅ in mutànt.