Woody Allen
|
C'l artìcul chè 'l è scrit in
Miranduléś |
Allan Stewart Königsberg, cgnusû méj c'n al nóm ad Woody Allen (New York, 30 ad Nuvémbar dal 1935, a s lèś [ˈwʊdi ˈælən] in ingléś) 'l è 'n atōr, senegiadōr, còmig, scritōr e regìsta americàṅ, vinsidōr ad quàtar Prèmi Òscar su sédas candidatùri, in dal 1978 p'r Io e Annie (regìa e senegiadùra), in dal 1986 p'r Hannah e le sue sorelle (senegiadùra) e in dal 2012 par Midnight in Paris (senegiadùra).
In dla sò vita 'l à girâ 57 film, da spés dal cumèdi cun di persunàǵ nevròtic e dasfurtunâ, in dua 'l à fat dimóndi vòlti la part dal prutagunìsta cuma atōr, vinsénd anc quàtar Golden Globe (òṅ a la caréra) e un muć 'd àtar prèmi in tut al mónd cuma 'n Lèòṅ 'd Òr a la caréra. In Itàglia 'l è stâ ardupiâ prima p'r Oreste Lionello e pò, a la sò mòrt, da Leo Gullotta.
In dal 1965 'l à firmâ la sò prima senegiadùra p'r un film dirèt par Clive Donner in dua 'l à recitâ insém a Peter Sellers, Peter O'Toole, la Romy Schneider, la Capucine e l'Ursula Andress. 'L an dòp 'l à girâ la sò prima pelìcula, Che fai, rubi?. 'L ùltim sò lavōr 'l è Un colpo di fortuna - Coup de Chance dal 2023.
Fra i sò àtar film più impurtànt a 'rcurdém Il dittatore dello stato libero di Bananas (1971), Tutto quello che avreste voluto sapere sul sesso* (*ma non avete mai osato chiedere) (1972), Manhattan, Stardust Memories (1980), Zelig (1983), La rosa purpurea del Cairo (1985), Radio Days (1987), Crimini e misfatti (1989), Misterioso omicidio a Manhattan (1993), Pallottole su Broadway (1994), Tutti dicono I Love You (1996), Celebrity (1998), Match Point (2005) e Vicky Cristina Barcelona (2008).
Allen 'l è spuśâ da 'l 1997 cun la Soon-Yi Previn, fiōla adutàda par la sò èx mujēr Mia Farrow ch'l'iva laurâ sèg in trédas pelìculi. A 'l inìsi di an stanta al gh'à abû na stòria cun Diane Keaton.
Culegamènt estéran
Àtar prugèt
Wikiquote contiene citazioni di o su Woody Allen
Wikimedia Commons contiene file multimediali su Woody Allen
