Within (film 2005)
|
C'l artìcul chè 'l è scrit in
Miranduléś |
 Within | ||
.png) Cala chè l'imbrujòna | ||
| A 'l intèran 2005 | ||
|---|---|---|
| Regìa: John A. Curtis • Merlin Ward | ||
| Scritōr: Rod Akizuki • John A. Curtis Jennifer Daley • Kim Small • Merlin Ward | ||
| Atōr: Amy Perfect • Fiona Glascott • Boyan Vukelic Derek Hamilton • John Tench • Hana Frejková | ||
| Müsica: Charles Olins • Mark Ryder | ||
| Léngua: Ingléś | ||
| Dürä dal film: 93 minüt | ||
| Nasiōṅ: Régn Unî • Itàglia Cànada • Repùblica Céca | ||
Within (A 'l intèran) 'l è 'n film ad scarésa psiculògic itagliàṅ, canadéś, britànic e cèc dal 2005 ad John A. Curtis e 'd Merlin Ward, girâ in dla Repùblica Céca.
Sunt
[mudéfica la surzéia]Mént'r i èṅ in Repùblica Céca par na vacànsa, quàt'r amìg americàṅ, Brad (Boyan Vukelic), la biundìna Christina (Fiona Glascott), T.K. (Derek Hamilton) e la Kelly (Amy Perfect), i càtan na mapa ch'la pòrta a 'n castèl antìg in dla campàggna dla Buèmia, lasàda da 'n làdar (Jakub Karduljak) ch'l iva tintâ a fargàr-ag na bórsa.
Al grup al tōś na màchina a nuléǵ p'r andàr a védar là a l'aventùra, giusà ch'a gh pòsa scapàr anc un teśôr. Rivâ a destinasiòṅ, i próan a insfilsàr-as dèntar, fursànd 'n us sarâ a ciàṿ c'n al fildfèr dal regipèt dla Kelly. Quànd la pòrta la s vèra, i quàtar i tìran drit sénsa far a mènt che pò 'l us al s sèra da par lò. Cal pòst lè 'l è 'n sit maladî, da i tèmp dal Mèdi Ēṿ, in du a s pōl sōl vgnir dèntar e mai andàr fóra. Par psēr lasàr la strutùra a gh vōl qualchidòṅ ch'al tóga 'l tò pòst.
I ragàs i s réndan cònt subìt ch'i pōl'n andàr in tut al diresiòṅ ma pò i tórnan sèmpar d'in du i èṅ daśvgnû. A 'l intèran dal castèl i càtan 'n óm ch'l è lè da soquànt an da par lò, Travis (John Tench), ch'al gh diś che lò al purà finalmènt èsar lìbar, insém a àtar tri dal grup, ma òṅ al gh'arà d'armagnàr lè parśunēr.
Èsar custrét a vìv'r in dal castèl, sénsa psēr durmìr e sénsa biśógn ad magnàr o bévar, 'l è 'n quèl spavintóś ad suo ma purtròp a gh'è d'l àtar. A tùran, i cundanâ i patìsan di arbgàt ch'i pàran véra in du i crédan 'd murìr, andgâ, saplî viṿ, bruśâ o viulentâ. Par psēr èsar lìbar, pasànd da 'n pasàǵ cgnusû da Travis, i quàt'r amìg, ch'in cal méntar sóta stress i aṅ tacâ anc a quistiunàr-as, i decìd'n ad far a sòrt. La sfurtùna la baśa la Christina che però la n gh stà minga e la taca a traplàr quèl cóntar Brad.