Vai al contenuto

Will Smith

Da Wikipedia.

C'l artìcul chè 'l è scrit in Miranduléś Emiliàn

Will Smith tòlt śò in dal 2011


Willard Carroll Smith II, cgnusû méj cuma Will Smith (Filadèlfia, 25 ad Setémbar dal 1968, a s lèś [wɪl smɪθ] in ingléś) 'l è 'n atōr, prudutōr e rapper americàṅ, vinsidōr dal Prèmi Òscar dal 2022 p'r al film biugràfic Una famiglia vincente - King Richard in dua lò 'l fava 'l pàd'r alenadōr dal tenìsti Venus e Serena Williams.

In bisàca al gh'à anc atri dó candidadùri a i Academy Award, in dal 2002 par la pelìcula ambintàda in dal mónd dal pugilâ Alì, in dla part ad Muhammad Alì, e in dal 2007 p'r al drama 'd Gabriele Muccino La ricerca della felicità. 'L à vins inólt'r un Golden Globe e quàtar Grammy Award in àmbit muśicàł. Al gh'à anc na stéla in dla Hollywood Walk of Fame.

Cuma muśicìsta 'l à publicâ siē àlbum, qvéi più vindû i èṅ i prim dū, Big Willie Style (1997) e Willennium (1999). Prima incóra 'l iva registrâ di lavōr ad sucès c'n al duo hip hop DJ Jazzy Jeff & The Fresh Prince.

Uriginàri dla Pennsylvania, Will al crés in na famìja burghéśa in dal quartēr multi-ètnig ad Germantown. Da śōv'n al cgnós a na fèsta Jeff Townes tacànd sèg na culaburasiòṅ in àmbit muśicàł dand vita a 'l duo DJ Jazzy Jeff & the Fresh Prince e faghénd vgnir fóra di pès cuma Girls Ain't Nothing but Trouble (1987), Parents Just Don't Understand (1988) e Summertime (1991).

A 'l inìsi di an Nuànta al tōś part a dó puntàdi dal telefìlm Blossom - Le avventure di una teenager ma la sò caréra da atōr la ciàpa 'l vōl tulénd part da prutagunìsta a la série televiśìva dla NBC Willy, il principe di Bel-Air in du al fava la part 'd un ragàs ad Filadèlfia ch'l éra andâ a star da di sò sîṅ cun di bèsi a Bel Air, un paiśèṅ califurgnàṅ darènt a Santa Mònica.

Will in dal 2016

Durànt al siē stagiòṅ dal prugràma al taca anc a lauràr a Hollywood recitànd in film cuma la cumèdia Made in America, cun la Whoopi Goldberg e la Jennifer Tilly, e 'l drama 6 gradi di separazione, in dua 'l fà finta 'd ès'r al fiōl ad Sidney Poitier par psēr far na vita in dl'élta sucietà 'd New York.

Vèrs la mità di an Nuànta al gira soquànt film ch'i gh'aṅ abû 'n sucès clamuróś fra 'l pùblic cuma Bad Boys (1995), al catastròfic Independence Day (1996), in di pagn 'd un capitàṅ di marines insém a Jeff Goldblum, Bill Pullman e Randy Quaid, Men in Black (1997), a fiànc ad Tommy Lee Jones, Vincent D'Onofrio e la Linda Fiorentino, e 'l thriller Nemico pubblico (1998), in còpia cun Gene Hackman. Dal 1999 l'è la pelìcula Wild Wild West cun Kevin Kline, la Salma Hayek e Kenneth Branagh.

In chi an lè al taca anc na caréra da par lò cuma artìsta rap dand a la luś di braṅ famóś cuma Men in Black, Gettin' Jiggy Wit It, Miami, Wild Wild West e Switch.

In di an Dumìla 'l è candidâ a i Prèmi Òscar par la part dal pùgil Muhammad Alì in Alì in du al lavóra cun Jamie Foxx e Jon Voight. Dòp avēr girâ i sequel Bad Boys II e Men in Black II, e avēr fat la part dal prutagunìsta in dal film ad fantasiénsa Io, robot 'd Alex Proyas, al mét in pē na cumpagnìa 'd prudusiòṅ ad film sua, la Overbrook Entertainment, ch'la finànsia 'l pelìculi Hitch - Lui sì che capisce le donne e La ricerca della felicità in dua, faghénd la part d'l imprendidōr Chris Gardner, al và dimóndi darènt a vìnsar 'l Òscar ch'al śvanìs par sōi quìndas vōt, finénd invéci a Forest Whitaker par L'ultimo re di Scozia.

Lò in dal 2008

A la fîṅ dal 2007 i sò film i ìvan muciâ sù da piò ad quàtar migliàrd e quàt'r ad dòlar tant ch'la rivìsta Newsweek la 'l à mis in dla lista di atōr più putènt a 'l mónd. 'L an dòp i rivan dū àtar sucès par lò c'n al pelìculi Hancock, giràda a fiànc dla Charlize Theron e 'd Johnny Galecki, e Sette anime par la regìa 'd Gabriele Muccino ch'al 'l iva bèla dirèt in La ricerca della felicità.

In dal 2019 'l à fat al gèni dla lamda in dal live action Aladdin, pelìcula ch'l'à fat sù un migliàrd e pasa ad dòlar, méntar tri an dòp a riva par lò anc al Prèmi Òscar p'r al film spurtìṿ su 'l surèli Williams Una famiglia vincente - King Richard. Durànt la serimògna 'd premiasiòṅ, dòp avēr sintî na batùda dal preśentadōr Chris Rock cóntar sò mujēr Jada Pinkett, ch'la gh'iva pôc cavìi in cô par via ad prubléma 'd alupècia, lò al s è alvâ sù par mulàr-'g un sćiafòṅ in dirèta davànti a tut dgénd-ag “Tîṅ al nóm ad mè mujēr fóra da la tò bóca dal cas!”. Ciapànd al prèmi, al s è pò scuśâ cun l'Academy e i sò culéga ma minga cun Rock.

Will al gh'à tri fiōi e a gh piàś śugàr a scac e a i śōg vìddeo. 'L è 'n fan ad Bob Marley e 'l è da la banda di demucràtic. 'L à ślungâ di finansiamènt par jutàr al vitmi d'l uragàṅ Katrina ch'l iva fat dimóndi diśàst'r in dal 2015 in dal sud di Stat Unî, specialmènt in Luiśiàna. 'L atōr al tîṅ par la squàdra 'd football americàṅ dla sò sità, i Philadelphia Eagles, e 'l è anc 'n asiunìsta di Philadelphia 76ers.

Filmugrafìa

[mudéfica la surzéia]
6 grâd ad separasiòṅ (1993)

Discugrafìa

[mudéfica la surzéia]
Lò in dal 2017

C'n i DJ Jazzy Jeff & The Fresh Prince

[mudéfica la surzéia]
  • 1987 – Rock the House
  • 1988 – He's the DJ, I'm the Rapper
  • 1989 – And in This Corner...
  • 1991 – Homebase
  • 1993 – Code Red
  • 1998 – Greatest Hits
  • 2006 – The Very Best of D.J. Jazzy Jeff & The Fresh Prince
  • 1997 – Big Willie Style
  • 1999 – Willennium
  • 2002 – Born to Reign
  • 2005 – Lost and Found
  • 2025 – Based on a True Story

Culegamènt estéran

[mudéfica la surzéia]

Àtar prugèt

[mudéfica la surzéia]
Estratto da "https://eml.wikipedia.org/w/index.php?title=Will_Smith&oldid=164997"