Victoria Jackson

C'l artìcul chè 'l è scrit in Miranduléś

La Victoria Jackson (Miami, 2 'd Agóst dal 1959) l'è n'atōra e còmiga americàna, cgnusùda p'r èsar stada na mémbra dal cast dal spetàcul televiśìṿ Saturday Night Live da 'l 1986 a 'l 1992.

Cuma atōra l'à fat al sò debùt a 'l cìnema in dal 1982 tulénd part a 'l thriller A doppia esposizione. In séguit l'à recitâ in cumèdi cuma Baby Boom, cun la Diane Keaton e James Spader, Ehi... ci stai?, cun prutagunìsta Robert Downey Jr., Lo strizzacervelli, a fiànc ad Dan Aykroyd e 'd Walter Matthau, UHF - I vidioti, in còpia cun "Weird Al" Yankovic, Sono affari di famiglia, cun Sean Connery, Dustin Hoffman e Matthew Broderick, e Ti amerò... fino ad ammazzarti in dua l'à incruśâ Kevin Kline, River Phoenix, William Hurt e Keanu Reeves.

Da i an Nuànta in avànti la sò caréra l'è andàda a crudàr par via dal fat ch'la catàva spasi sōl in pelìculi da pôc, in tut al manéri l'à tòlt part a la cumèdia In fuga a Las Vegas (1996) e Romantica Jeana (2005).

In televiśiòṅ a l'ém vista in di telefìlm I Jefferson, Mezzo Pollice, L'ispettore Tibbs, X-Files, Sabrina, vita da strega, Ocean Ave. e Romeo!.

Cuma cristiàna cunservadōra, cuma l'à sèmpar vlû batśàr-as, e sustenidōra dal Tea Party la gh l'iva dimóndi c'n al presidènt Barack Obama esénd ch'la gh'iva dâ dal cumunìsta iślamìsta e jihadìsta mémbar di fradèi musulàṅ e avénd dit ad lò ch'al vliva masàr i vèć e i putèṅ e ch'l éra cumpàgn a Adolf Hitler.

Soquànt di sò film

1982 - A doppia esposizione (Double Exposure), regìa ad William Byron Hillman
1986 - Stoogemania: i nuovi fratelli Marx (Stoogemania), regìa ad Chuck Workman
1987 - Baby Boom, regìa ad Charles Shyer
1987 - Ehi... ci stai? (The Pick-Up Artist), regìa ad James Toback
1988 - Lo strizzacervelli (The Couch Trip), regìa ad Michael Ritchie
1988 - Casual Sex (Casual Sex?), regìa dla Geneviève Robert
1989 - Un piccolo sogno (Dream a Little Dream), regìa ad Marc Rocco
1989 - UHF - I vidioti (UHF), regìa ad Jay Levey
1989 - Sono affari di famiglia (Family Business), regìa ad Sidney Lumet
1990 - Ti amerò... fino ad ammazzarti (I Love You to Death), regìa ad Lawrence Kasdan
1996 - In fuga a Las Vegas (Wedding Bells Blues), regìa dla Dana Lustig
2004 - Shut Up and Kiss Me!, regìa ad Gary Brockette
2005 - Romantica Jeana (Her Minor Thing), regìa ad Charles Matthau

Culegamènt estéran

Àtar prugèt

Wikimedia Commons contiene file multimediali su Victoria Jackson