Venice Express
|
C'l artìcul chè 'l è scrit in
Miranduléś |
 Night Train to Venice | ||
| Venice Express | ||
 Grant e McDowell in na figùra dal film | ||
| Esprés par Venèsia 1993 | ||
|---|---|---|
| Regìa: Carlo U. Quinterio | ||
| Scritōr: Leo Tichat • Toni Hirtreiter | ||
| Atōr: Hugh Grant • Tahnee Welch • Rachel Rice Malcolm McDowell • Samy Langs • Roland Astor Kristina Söderbaum • Evelyn Opela • David Kehoe | ||
| Müsica: Wolfgang Hammerschmid • Natalya Lapina | ||
| Léngua: Ingléś | ||
| Dürä dal film: 72 minüt | ||
| Nasiōṅ: Germàgna | ||
Venice Express (Esprés par Venèsia) 'l è 'n film misterióś tedésc dal 1993 dal fiurintèṅ Carlo U. Quinterio. Al prutagunìsta Hugh Grant in n'intervìsta dal 2002 'l à dit che cal film chè 'l è 'l più brut che lò 'l àppia mai girâ.
Sunt
[mudéfica la surzéia]Martin Gimmle (Hugh Grant) 'l è 'n giurnalìsta scuséś ch'l è drē a scrìv'r un lìbar su di grup neo-naśìsta in Európa. Al gh'à da cunsgnàr al sò rapòrt a 'n editōr itagliàṅ di edisiòṅ „Infèran“, al tōś acsè 'n trêṅ a vapōr a Mònag 'd Bavéra par rivàr a Venèsia, ch'a gh'è anc al carnevàł. Al s pòrta adrē al sò computer purtàtil e anc un floppy disk cun registrâ dènt'r al dossier.
Al trêṅ al pasa i Alp, al gira fra i bòsc, in mèś a la néṿ, al vîṅ fóra da di tùnel, al fà dimóndi fum, etc... Fra i viaśadōr a gh'è l'atōra Vera Cortese (Tahnee Welch) armàśa védva da pôc, la sò putìna Pia (Rachel Rice), la balarìna Tatjana (Evelyn Opela) ch'la gh'à paùra 'd armàgnar paraliśàda su na scrana a rudèli, la drag queen Pedro (Samy Langs) ch'la s eśibìs faghénd l'Édith Piaf, un sunadōr ad piàṅ négar (Murphy McLaren) amìg dal travestî, al cuntrulōr (David Kehoe) e sinc naziskin: Udo (Robinson Reichel), al cap, Max (Ralph Herforth), Walter (Burkhard Kosminski) e àtar dū. La Vera e Martin i faṅ dū ciacri e i s inamóran subìt. A n sèrt punt a sparìs la Pia ma par furtùna i la càtan ch'a n gh'è sucès gnint, l'iva sōl pardû la sò bàmbula.
Un naziskin al taja na maṅ a Martin druànd un curtlèṅ: par furtùna la Vera la gh'à quèl da métar-'g insìma in dla burséta: i dū i ciapàn l'ucasiòṅ a 'l vōl par far sès in dal vagòṅ ch'a gh'è anc la putìna lè. A tgnir 'd òć i dū a gh'è 'n tisi misterióś (Malcolm McDowell).
Quànd al trêṅ al riva a Venèsia, la Vera la fà 'n viàś in vapurét cun Martin, méntar la gint l'è in gir in mascra a festegiàr e i clómb i vōlan dapartùt fra 'l gónduli e i campanìi mént'r al campàni i sònan. La dóna la 'l pòrta pò a cà par far-ag véd'r al sò apartamènt e i dū i finìs'n a lèt, prima che 'l óm al vaga via p'r al sò apuntamènt cun 'l editōr. Rivâ là, al giurnalìsta al fà un gir in dal palàs ma a n gh'è ninsòṅ, sōl dla pólvra e 'n grup ad rottweiler catìṿ ch'i èṅ drē a magnàr dla carna in na cambra. Martin al decìd 'd andàr via ma lè 'l incróśa i naziskin ch'i gh 'l ànan sèg. Martin al ciàpa na mòta e 'l próa a samnàr-i ma i tedésc i mòntan sù a 'n furgunsèṅ e i gh tìn'n adrē p'r al stradi dla sità lagunàra. A n sèrt punt però i fànan 'n incidènt ch'a gh'è dal tràfic: Martin al casca par tèra e 'l pèrd la memòria, i naziskin i fìnis'n invéci in mèś a 'l fōg.
Martin al n sà piò chi 'l è, al tórna acsè da la Vera. I dū i vàn'n a tōr quèl a 'l bar. Lè darènt a gh'è sèmp'r al furastēr dal trêṅ ch'al li guàrda fis. In cal méntar la badànta dla Pia, lʼEufemia (Kristina Söderbaum), esénd ch'la s è daśmindgàda 'd tōr quèl quànd l'à fat al còmpri, la lasa da par lē la putìna. Chi lē la fà 'n gir su 'l balcòṅ e pò la s buta śò. Par furtùna Martin al la ciàpa a 'l vōl, salvànd-la. Al film al finìs acsè.