Vai al contenuto

Valeria Golino

Da Wikipedia.

C'l artìcul chè 'l è scrit in Miranduléś Emiliàn

La Golino tòlta śò in dal 2015


La Valeria Golino (Nàpuli, 22 'd Utóbar dal 1965, a s lèś [vaˈlɛːrja ɡoˈliːno] in itagliàṅ) l'è n'atōra, mudèla e regìsta itagliàna, vinsidōra ad tri Dàvid ad Dunatèl, quàtar Nàstar 'd Argìnt e 'd dó Cópi Volpi a 'l Fèstival ad Venèsia.

L'à tacâ la sò caréra in di an Utànta tulénd part a pelìculi cuma la cumèdia Scherzo del destino in agguato dietro l'angolo come un brigante da strada (1983), cun Ugo Tognazzi e Renzo Montagnani, e 'l drama Gli occhiali d'oro (1987), a fiànc ad Philippe Noiret, ad Rupert Everett e dla Stefania Sandrelli.

In dal 1988 la riva a Hollywood par recitàr in dal drama Rain Man - L'uomo della pioggia a fiànc ad Dustin Hoffman e 'd Tom Cruise e pò incóra in dal 1991 in dal thriller L'anno del terrore, cun la Sharon Stone, in dal drama Lupo solitario, insém a David Morse, Viggo Mortensen e la Patricia Arquette, e in dla cumèdia Hot Shots! cun prutagunìsta Charlie Sheen.

In di an Nuànta a l'ém vista anc in dla cumèdia Puerto Escondido (1992), in còpia cun Diego Abatantuono, in dal drama sentimentàł Via da Las Vegas (1995), a fiànc ad Nicolas Cage e dl'Elisabeth Shue, in dla cumèdia grutésca Four Rooms (1995), in di pagn dna stria, in d'l aventuróś Fuga da Los Angeles (1996), cun prutagunìsta Kurt Russell, in dal drama L'albero delle pere (1998), in dua l'à laurâ cun Sergio Rubini e Stefano Dionisi, e in Harem Suare (1999), secónd film ad Ferzan Özpetek.

In séguit l'à recitâ in dal drama Le cose che so di lei (2000), cun la Glenn Close e la Cameron Diaz, in dla cumèdia Hotel (2001), cun Julian Sands, in dal biugràfic Frida (2002), cun la Salma Hayek in di pagn dla pitōra mesicàna Frida Kahlo, in dal pulisiésc 36 Quai des Orfèvres (2004), incruśànd su 'l set Daniel Auteuil e Gérard Depardieu, in dal śal La ragazza del lago (2007), in còpia cun Toni Servillo, e in dal drama Caos calmo (2008), a fiànc ad Nanni Moretti, 'd Alessandro Gassmann e dl'Isabella Ferrari.

Fra i sò ùltim lavōr a 'rcurdém al drama Come il vento (2013), in còpia cun Filippo Timi, al noir Il capitale umano (2013), cun Fabrizio Bentivoglio e la Valeria Bruni Tedeschi, al drama Tutto il mio folle amore (2019), cun prutagunìsta Claudio Santamaria, e 'l stòrig Ritratto della giovane in fiamme (2019) faghénd la màdar dl'Adèle Haenel.

Da regìsta l'à dirèt dó pelìculi: Miele (2013), preśentàda a 'l 66śum Fèstival ad Cannes, e Euforia (2018).

Dòp dal stòri abùdi c'n i atōr Benicio del Toro, Fabrizio Bentivoglio, Andrea Di Stefano e Riccardo Scamarcio (da 'l 2006 a 'l 2018) e c'n al regìsta Peter Del Monte, da 'l 2018 la stà cun 'l avucàt Fabio Palombi.

Filmugrafìa

[mudéfica la surzéia]
Harem Suare (1999)
Al ròbi ch'a sò 'd lē (2000)
Giùdas spagnōi (2000)

Culegamènt estéran

[mudéfica la surzéia]

Àtar prugèt

[mudéfica la surzéia]
Estratto da "https://eml.wikipedia.org/w/index.php?title=Valeria_Golino&oldid=166225"