Ursula Thiess
|
C'l artìcul chè 'l è scrit in
Miranduléś |
LʼUrsula Schmidt, cgnusùda méj cuma Ursula Thiess da 'l cugnóm dal sò prim marè (Ambûrg, 15 ad Maǵ dal 1924 - Burbank, 19 ad Śugn dal 2010, a s lèś [ˈʊʁzula tiːs] in tedésc), l'è stada n'atōra e ardupiadōra tedésca.
Biugrafìa
LʼUrsula l'à tacâ a recitàr da śōvna a teàt'r in Germàgna par pò dar la sò vōś p'r ardupiàr di film americàṅ. In dal 1942 l'à spuśâ 'l prudutōr Georg Thiess, avénd sèg dū fiōi, la Manuela e Michael. Finìda la secónda guèra mundiàla la còpia la s divìd, cun lʼUrsula ch'la taca a far la mudèla a Berlîṅ, figurànd anc in na quàlc cupertìna dal rivìsti Der Spiegel e Life. In séguit al prudutōr Howard Hughes al gh buta i òć adòs faghénd-ag firmàr un cuntràt par la RKO.
Rivàda in di Stat Unî la Thiess la cata spasi in soquànt pelìculi di an Sinquànta cuma I fucilieri del Bengala (1954), a fiànc ad Rock Hudson, Il guanto di ferro (1954), cun Robert Stack, L'americano (1955), cun prutagunìsta Glenn Ford, e Bandido (1956), in còpia cun Robert Mitchum.
Dòp al matrimòni c'n al culéga Robert Taylor, la Thiess la decìd ad dar-'g un taj cun la sò caréra par tgnir adrē a la sò famìja, e a i sò àtar dū putèṅ Terrance e Tessa abû da lò, in dal ranch a Brentwood (Califòrgna). In séguit l'è turnàda a recitàr in dū telefìlm di an Ssanta, I detectives (insém a sò marè), e Indirizzo permanente (par na puntàda).
Dòp la mòrt ad sò fiōl Michael, a vint-a-tri an par n'overdose, e 'd sò marè Taylor, la Thiess l'è andàda a star a Bel Air spuśànd al distribudōr ad film Marshall Schacker.
La Thiess l'è mòrta a utànta-siē an. Al sò còrp al pònsa a 'l Forest Lawn Memorial Park ad Glendale, darènt a qvél ad Robert Taylor e a qvél ad sò fiōl Michael.
Filmugrafìa
- 1949 - Nachtwache, regìa 'd Harald Braun
- 1952 - Monsoon, regìa ad Rod Amateau
- 1954 - I fucilieri del Bengala (Bengala Brigade), regìa ad László Benedek
- 1954 - Il guanto di ferro (The Iron Glove), regìa ad William Castle
- 1955 - L'americano (The Americano), regìa ad William Castle
- 1956 - Bandido, regìa ad Richard Fleischer