Un poliziotto da happy hour
|
C'l artìcul chè 'l è scrit in
Miranduléś |
 The Guard | ||
| Un poliziotto da happy hour | ||
 Don Cheadle e Gleeson in na figùra dal film | ||
| Un pulisiòt da happy hour 2011 | ||
|---|---|---|
| Regìa: John Michael McDonagh | ||
| Scritōr: John Michael McDonagh | ||
| Atōr: Brendan Gleeson • Don Cheadle Mark Strong • Liam Cunningham • David Wilmot Fionnula Flanagan • Katarina Čas • Rory Keenan Dominique McElligott • Laurence Kinlan | ||
| Müsica: Calexico | ||
| Léngua: Ingléś • Gaèlic | ||
| Dürä dal film: 96 minüt | ||
| Nasiōṅ: Irlànda • Stat Unî • Régn Unî | ||
Un poliziotto da happy hour (Un pulisiòt da happy hour) 'l è 'n film pulisiésc dal 2011 ad John Michael McDonagh, chè a 'l sò debùt.
La pelìcula, preśentàda a 'l Fèstival 'd Berlîṅ e a 'l Sundance Film Festival, l'à muciâ sù da piò ad vint-i-òṅ migliòṅ ad dòlar, faghénd al record in Irlànda, dòp ès'r-an custàda siē.
Sunt
Gerry Boyle (Brendan Gleeson), sergînt put dla Garda Síochána, al viṿ da par lò in dla part a òvest dl'Irlànda in dla regiòṅ salvàdga dla Connemara. A gh'è armàś sōl sò màd'r Eileen (Fionnula Flanagan) ch'l'è a 'l ricòvar e la gh'à pôc da scampàr. In servìsi 'l è śbucâ, al s grata i maròṅ, al rispónd franc a i sò superiōr, al bév, al và a putàni e s'al cata d'l ecstasy in bisàca a i delinquènt al la dróa lò.
In paéś 'l è drē a rivàr un càr'g ad dròga da la Giamàica da part 'd un grup ad traficànt furmâ par Francis Sheehy-Skeffington (Liam Cunningham), al cap, Clive Cornell (Mark Strong) e Liam O'Leary (David Wilmot) mént'r un quàrt mémbar, Hugh Sheehan, 'l è stâ masâ da lōr parchè batśâ cuma instàbil e dònca 'n perìcul par l'urganiśasiòṅ.
Boyle e 'l sò culéga Aidan McBride (Rory Keenan) i càt'n al sò cadàvar cun dal paśni dla Bìbia in bóca e a 'l inìsi i pénsan ch'a gh pòsa ès'r in gir un manìag ma l'è tuta na trapla strulgàda da Francis p'r ustaculàr gl'indàśìn su 'l sò uperasiòṅ. Par jutàr la pulisìa dal pòst, da l'Amèrica a riva 'l agìnt d'l FBI Wendell Everett (Don Cheadle) ma la gint dal pòst la n è minga tant gustóśa sèg, rivànd anc a dar-ag cóntar.
Na sira McBride par caś al férma la màchina di traficànt, par via 'd un fanàł rót, e 'l vîṅ masâ da O'Leary. Sò mujēr Gabriela (Katarina Čas), vdénd ch'al n è minga turnâ a cà, la và ad nòt a denunsiàr al fat a Boyle ch'in séguit al cata la sò màchina vōda lung la còsta, cuma s'al s fus tòlt la vita andgànd-as. Al pulisiòt al n créd minga ch'a sia andàda acsè e 'l và avànti cun l'indàśìn. Clive al próa a ślungàr-ag di bèsi par far-ag srar 'n òć, na sulusiòṅ ch'l'à sèmpar funsiunâ cun tut, ma McBride 'l è 'n óm a l'antìga e 'l vōl rivàr a farmàr-i.
Na sira, turnànd a cà, Boyle al cata Sheehan sintâ su na pultròna dal sò salòt ch'al scólta 'n disc. Al gh'à na pistòla in maṅ e 'l è ciàr ch'al vója masàr-al. Boyle al próa a distràr-'l un àtim cun di dascōrs, pò al s mét na maṅ dènt'r i pantalòṅ dgénd ch'l è fàcil ch'al s sia bcâ quèl andànd cun dó putàni ad Dublîṅ, pò al tira fóra 'l pistulèṅ ch'al gh'iva in dal mudàndi par sparàr a 'l delinquènt. Boyle al sà ch'al càr'g ad dròga 'l è drē a rivàr pròpria cla nòt lè. Al ciàma Wendell par cuntàr-'g incòsa, pò al và da par lò in dal pòst in du a gh'à da rivàr la barca p'r arestàr Francis e Clive o murìr in dal tintatìṿ.