Un giorno di ordinaria follia
|
C'l artìcul chè 'l è scrit in
Miranduléś |
 Falling Down
| ||
| Un giorno di ordinaria follia | ||
 Michael Douglas in na figùra dal film | ||
| Un dè 'd matéria urdinària 1993 | ||
|---|---|---|
| Regìa: Joel Schumacher | ||
| Scritōr: Ebbe Roe Smith | ||
| Atōr: Michael Douglas • Robert Duvall • Lois Smith Barbara Hershey • Rachel Ticotin • Joey Singer Tuesday Weld • Frederic Forrest • Steve Park | ||
| Müsica: James Newton Howard | ||
| Léngua: Ingléś | ||
| Dürä dal film: 113 minüt | ||
| Nasiōṅ: Stat Unî | ||
Un giorno di ordinaria follia (Un dè 'd matéria urdinària) l è 'n film dramàtic dal 1993 ad Joel Schumacher, girâ a Los Angeles.
La pelìcula, preśentàda a 'l 46śum Fèstival ad Cannes, l'à fat sù nuànta-siē migliòṅ ad dòlar dòp ès'r-an custàda vint-sinc.
Sunt
Bill Foster (Michael Douglas) 'l è 'n óm ad quarànt'an e 'l è a pès. Sò mujēr Elisabeth (Barbara Hershey) la s è divìśa sèg purtànd-as via la putìna ch'i gh'aṅ abû insém, lʼAdele (Joey Hope Singer). In dal méntar lò al vîṅ anc lasâ a cà da l'aśiénda in du 'l lavóra parchè cunsiderâ vèć. Bill 'l è custrét a 'ndàr a vìvar da sò màdar (Lois Smith), ch'la n sà gnint dal licensiamènt.
Un dè, méntar 'l è blucâ in dal tràfic dla Califòrgna ch'a gh'è 'n cald sasèṅ ch'a n s tira gnanc fiâ, Bill al mòla lè la sò màchina, al tōś la sò valìś 'd lavōr e al s 'n in và, cun la gint in strada ch'la gh ingùra di càncar. Fra 'd lōr a gh'è anc al sergînt Martin Prendergast (Robert Duvall) a 'l sò ùltim dè 'd lavōr prima 'd andàr in pensiòṅ. Al pulisiòt al s nòta la targa dla màchina bandunàda: „D-Fens“.
In cal méntar Bill, ch'l è andâ via a pē, al dmanda a 'l gestōr 'd un minimarket, al cureàṅ Lee (Michael Paul Chan), ad cambiàr di dòlar parchè i gh sarvìsan dal munédi par telefunàr a la sò putìna ch'la cumpìs i an e che sò mujēr la n gh fà minga védar parchè i giùdas i gh'aṅ fat cónt'r un órdan restritìṿ. Al negusiànt al gh diś ad nò parchè al gh'à almànc da cumpràr quèl. Bill al tōś na Coca-Cola ma 'l taca a quistiunàr-as parchè al prèsi 'l è tròp élt. Lee al próa a farmàr-al c'n un bastòṅ da baseball ma Bill al gh al tōś par pò śbragàr incòśa in dal negòsi. Prima 'd andàr via, al gh paga la latìna.
In séguit Bill al finìs in dal quartēr ispànig dla sità. Al cata dū śōvan ch'i tàc'n a dar-'g adòs parchè lò al s è parmìs ad pasàr in dal sò teritòri, pò i tìran fóra 'n curtèl par far-as dar la valìś. Bill però al i fà scapàr via druànd al bastòṅ ad prima, pò al cata sù 'l curtlèṅ e 'l và a telefunàr a sò mujēr. 'L óm al vrév purtàr un rigàl a la sò putìna ma lʼElisabeth la gh diś ad vansàr che lʼAdele la stà bèṅ anc sénsa pàdar. In cal méntar i rìvan di mémbar dla gang di latinos che lò 'l iva piciâ. I vèran fōg cónt'r ad lò sénsa però bcar-al. Quànd chi lōr i èṅ vitma d'n incidènt, Bill al gh pòrta via la bórsa cun di arm dèntar.
Bill al và in un fast food par magnàr quèl ma i ragàs a 'l tàvul i gh dìśan ch'i n gh pōlan minga sarvìr la clasiòṅ parchè 'l è tròp tard, al gh'iva da rivàr soquànt minùt prima. Bill al n in pōl piò, al pèrd la tèsta e 'l tira fóra na mitràja.
Al sergînt Martin insém a la sò culéga Sandra Torres (Rachel Ticotin) i s mét'n a dar-ag la casa.