Vai al contenuto

Udo Kier

Da Wikipedia.

C'l artìcul chè 'l è scrit in Miranduléś Emiliàn

Udo Kier tòlt śò in dal 2011


Udo Kierspe, cgnusû anc cuma Udo Kier (Culògna, 14 'd Utóbar dal 1944 - Palm Springs, 23 ad Nuvémbar dal 2025), 'l è 'n stâ atōr tedésc.

Uriginàri dla Renàgna Setentriunàla-Vestfàglia, Udo al nas in 'n uśdàł ad Culògna durànt la secónda guèra mundiàla. Lò e sò màdar i èṅ stâ tirâ fóra a fadìga da 'l edifìsi crudâ sóta i bumbardamènt.

A daśdòt an al và a star a Lóndra, tacànd pò na caréra da atōr a la fiṅ di an Ssanta tulénd part a pelìculi cuma La stagione dei sensi, cun na senegiadùra firmàda fra i àtar da la Barbara Alberti e da Dario Argento, e La tortura delle vergini pò in séguit al gira dū film prudót p'r Andy Warhol e dirèt par Paul Morrissey, Il mostro è in tavola... barone Frankenstein (1973), cun Joe Dallesandro e la Dalila Di Lazzaro, e Dracula cerca sangue di vergine... e morì di sete!!! (1974), sèmpar cun Dalessandro, Vittorio De Sica, la Stefania Casini e la Milena Vukotic.

In dal 1975 al tōś part a la pelìcula eròtica Histoire d'O a fiànc dla Corinne Cléry méntar 'l an dòp al rècita in Spermula cun prutagunìsta la Dayle Haddon. In dal 1977 al fà 'l psicòlug Dr.Mandel in dal film ad scarésa ad Dario Argento Suspiria, insém a la Jessica Harper, la Stefania Casini, l'Alida Valli e la Joan Bennett. Cun Rainer Werner Fassbinder al gira in dal 1979 la cumèdia dramàtica La terza generazione cun Harry Baer, la Margit Carstensen e l'Hanna Schygulla.

In di an Utànta Udo al lavóra par Walerian Borowczyk in di sò film eròtic Lulù, cun Michele Placido, e Nel profondo del delirio e pò al taca na culaburasiòṅ cun Lars von Trier girànd sèg Epidemic (1987) e pò dimóndi atri sò òvri in di an a vgnir.

In di an Nuànta a 'l arcurdém p'r i sò film cun Gus Van Sant Belli e dannati, insém a River Phoenix e Keanu Reeves, e Cowgirl - Il nuovo sesso, in dla part 'd un regìsta, e pò p'r al cumèdi Amore con interessi, cun prutagunìsta Michael J. Fox, Ace Ventura - L'acchiappanimali, a fiànc ad Jim Carrey, dla Courteney Cox e dla Sean Young, p'r al fanasientìfic Johnny Mnemonic, sèmpar cun Keanu Reeves, p'r al drama Le onde del destino, in di pagn 'd un marinàr sàdig, p'r al fantàstic Le straordinarie avventure di Pinocchio, faghénd al buratinàr catìṿ Lorenzini in un film trat da la fòla Gl'aventùri 'd Pnòć. Stòria 'd un buratèṅ, p'r al film 'd asiòṅ Blade, cun Wesley Snipes, e p'r Armageddon - Giudizio finale, pelìcula cun Bruce Willis, la Liv Tyler e Ben Affleck. Sèmp'r in chi an lè al rècita in di vìddeo Deeper and Deeper dla Madonna e Make Me Bad di Korn.

Fra i sò ùltim lavōr a 'l cìnema a 'rcurdém i film fat cun Lars von Trier, Dancer in the Dark cun la Björk, Dogville cun la Nicole Kidman, Melancholia cun la Kirsten Dunst e Nymphomaniac cun Shia LaBeouf ma anc i film ad scarésa Paura.com, insém a Stephen Rea, Grindhouse, cun Bruce Willis e Kurt Russell, Van Helsing - Dracula's Revenge, a fiànc ad Casper Van Dien, La terza madre, cun prutagunìsta l'Asia Argento, e Halloween - The Beginning, cun Malcolm McDowell e Brad Dourif.

In televiśiòṅ a 'l ém vist in dla Berlin Alexanderplatz e pò anc in dla série televiśìva The Kingdom - Il regno par la regìa ad Lars von Trier, in I Borgia e in dal telefìlm Chuck in dla part 'd Otto, un negusiànt ad diamànt.

Prima 'd murìr a utànt'un an in na clìnica dla Califòrgna, al gh'à abû dal relasiòṅ c'n al regìsta Rainer Werner Fassbinder e cun 'l artìsta Delbert McBride.

Filmugrafìa

[mudéfica la surzéia]

Culegamènt estéran

[mudéfica la surzéia]

Àtar prugèt

[mudéfica la surzéia]
Estratto da "https://eml.wikipedia.org/w/index.php?title=Udo_Kier&oldid=165339"