Tredici variazioni sul tema
|
C'l artìcul chè 'l è scrit in
Miranduléś |
 Thirteen ConversationsAbout One Thing | ||
| Tredici variazioni sul tema | ||
 Alan Arkin in na figùra dal film | ||
| Trédas variasiòṅ su 'l argumènt 2001 | ||
|---|---|---|
| Regìa: Jill Sprecher | ||
| Scritōr: Jill Sprecher • Karen Sprecher | ||
| Atōr: Alan Arkin • John Turturro • Clea DuVall Matthew McConaughey • Amy Irving • Rob Mac Frankie Faison • William Wise • Barbara Sukowa Malcolm Gets • Shawn Elliott • David Connolly Tia Texada • A.D. Miles • Peggy Gormley | ||
| Müsica: Alex Wurman | ||
| Léngua: Ingléś • Tedésc • Itagliàṅ | ||
| Dürä dal film: 104 minüt | ||
| Nasiōṅ: Stat Unî | ||
Tredici variazioni sul tema (Trédas variasiòṅ su 'l argumènt) 'l è 'n film dramàtic americàṅ dal 2001 dla Jill Sprecher.
Al film, ch'l à muciâ sù tri migliòṅ e sèt ad dòlar dòp ès'r-an custâ tri, 'l incróśa 'l viti ad quàtar persunàǵ ad New York (Alan Arkin, John Turturro, la Clea DuVall e Matthew McConaughey), miténd insém trédas cunsèṅ ad pelìcula, tut cun 'n afurìśma a 'l inìsi.
Sunt
[mudéfica la surzéia]'L ambisióś prucuradōr distretuàł Troy (Matthew McConaughey), dòp avēr cundanâ un làdar, al fà 'l śburòṅ in un bar c'n un tisi cgnusû a 'l bar, Gene (Alan Arkin), pò al tórna a cà in màchina. Sénsa vlēr al mét sóta na ragàsa biónda, la Beatrice (Clea DuVall), ch'la casca par tèra in na pùcia 'd sànguv. 'L óm, ch'in d'l incidènt al s è fat mâł a sò vòlta a 'l pōls dla tèsta ch'a gh s è avèrt un taj, al decìd al lasàr-la lè, cardénd-la mòrta, e 'd turnàr subìt a 'l sò apartamènt. In séguit al vénd la sò màchina a 'n sèrt Walker (John Turturro) parchè i gh prév'n èsar di ségn insìma ma purtròp al pinsēr d'l incidènt 'l è fis in dla sò mènt e lò 'l è pîṅ ad sèns ad cólpa.
Walker, prufesōr ad fìśica, 'l è spuśâ da dimóndi an cun la Patricia (Amy Irving) ma 'l è stuf ad star sèg tant ch'al s è fat n'amànta in dla sò culéga Helen (Barbara Sukowa). Quànd la Patricia la 'l vîṅ a savēr, la decìd ad mulàr-al, un quèl ch'la fà anc lʼHelen quànd la s rénd cònt che lò al n gh tîṅ minga tant a lē cuma invéci sò marè. Sóta strès p'r i sò prubléma sentimentài, Walker al trata mâł un sò studènt ch'al vrév dvintàr un mèdag (Rob Mac) che pò al decìd ad tōr-as la vita.
Gene 'l è divursiâ e 'l gh'à 'n fiōl drugâ pódag, Ronnie (Alex Burns), cun di prubléma cun la giustìsia. Ad mistēr al lavóra par n'asicurasiòṅ insém a i sò culéga Dick Lacey (Frankie Faison) e Wade Bowman (William Wise), 'l ùltim rivâ, sèmpar cuntènt e cun d'l utimìśum, mai incasâ o daśgustâ, un fat ch'al dà fastìdi a Gene ch'al decìd ad licensiàr-al quànd la sò cumpagnìa la gh diś ch'a gh'è da far di taj. Anc se lasâ a cà, Wade al n gh l'à minga sèg, 'l armàgn sèmpar dispunìbil e amìg in di sò cunfrònt. Dòp ès'r-as pintî dla sò cativèria e avēr-ag catâ 'n pòst in na cumpagnìa cuncurènta, Gene al vîṅ licensiâ a sò vòlta da l'asicurasiòṅ.
La Beatrice la fà 'l pulisìi in di apartamènt par cònt ad gint cun di bèsi e la canta in un côr in céśa. Na sira, méntar l'è drē a turnàr a cà cun na camìśa d'n architét (Malcolm Gets) ch'la gh'à da giustàr, la vîṅ misa sóta da la màchina 'd Troy ch'al n s férma minga par jutàr-la. La ragàsa la finìs a 'l uśdàł pîna 'd bòti, bugni e murèi ma qvél ch'l è impurtànt 'l è ch'l'è viva par miràcul. Cun 'l ajùt ad sò màdar (Peggy Gormley) e dla sò amìga Dorrie (Tia Texada) la guarìs piàn piàṅ ma 'l sò caràt'r al càmbia, dvintànt più dûr e cìnic cuma qvél dla sò amìga. La 'n à visti tròpi, la cativèria dla gint la l'à culpìda, anc 'l architét 'l iva pinsâ subìt che lē la gh'is fargâ 'n arlói, séns àtar parchè l'éra na puvràsa, quànd invéci la 'l iva sōl mis via par dar-'g-'l indrē a la prima ucaśiòṅ.