Transesualìśum
|
C'l artìcul chè 'l è scrit in
Miranduléś |
Al transesualìśum (transessualità o transessualismo in itagliàṅ) 'l è na cundisiòṅ ad dna parsòna ch'la sènt ch'al sès ch'al gh'à da quànd 'l è nâ al n è minga qvél giùst par lò (o lē), tgnénd cònt ad qvél ch'al s sènt dèntar dabòṅ, e dònca al viṿ su la sò pèl na disfurìa 'd gènar.
I sugèt transesuài i pōlan far di tratamènt par davśinàr-'s a 'l sès ch'i sèntan giùst par lōr, cuma far dal terapìi urmunàli o di uperasiòṅ da 'l cirùśig, a 'l pèt o a i òrgan genitài.
A gh'è dal difarénsi c'n al parsòni transgender o travestî parchè chi lōr minga par fòrsa i sént'n al biśógn ad cambiàr sès.
Al tèrmin "transesuàł" 'l è stâ invintâ in dal 1949 p'r al dutōr David Cauldwell (1897-1959) ma 'l à tacâ a èsar druâ da tut da 'l 1966 in avànti dòp la publicasiòṅ dal lìbar The Transsexual Phenomenon dal dutōr Harry Benjamin. Al 19 ad Śugn dal 2018 l'urganiśasiòṅ Mundiàla dla Salùt l'à scanślâ al transesualìśum da la lista di mâi mentài.
In gèrg i s definìsan FtM (Female-To-Male, da Fémna a Masć) al parsòni nadi fémni ch'i s séntan masć e MtF (Male-To-Female, da Masć a Fémna) al parsòni nadi masć ch'i s séntan fémni. I èṅ pò definî minga binary i sugèt ch'i n s séntan briśa par fòrsa o óm o dóni.