Tony Randall

C'l artìcul chè 'l è scrit in Miranduléś

Aryeh Leonard Rosenberg, cgnusû méj cuma Tony Randall (Tulsa, 26 ad Favràr dal 1920 - New York, 17 ad Maǵ dal 2004, a s lèś [ˈtəʊniː ˈrændəl] in ingléś) 'l è stâ 'n atōr, còmig e cantànt americàṅ, vinsidōr d'n Emmy Award in dal 1975 par la part ad Felix Ungar in dla série televiśìva La strana coppia che lò 'l à fat in còpia cun Jack Klugman par 114 puntàdi.

Al gh'à na stéla in dla Hollywood Walk of Fame.

Biugrafìa

Uriginàri dna famìja ebrèja d'l Oklahoma, Randell 'l à tacâ la sò caréra da atōr in dal 1942 faghénd dal part piculìni in dal thriller sentimèntàl Sabotatori 'd Alfred Hitchcock e Casablanca ad Michael Curtiz par pò dar in di an la sò vōś par soquànt persunàǵ di cartòṅ animâ dla Walt Disney Pictures cuma Le avventure di Ichabod e Mr. Toad, Cenerentola, Alice nel Paese delle Meraviglie, La spada nella roccia, Gli Aristogatti, Red e Toby nemiciamici, Basil l'investigatopo e Bianca e Bernie nella terra dei canguri.

In séguit 'l à catâ spasi in La bionda esplosiva (1957), in còpia cun la Jayne Mansfield, e in Il gioco dell'amore (1959), cun la Debbie Reynolds, par pò lauràr a fiànc ad Rock Hudson e dla Doris Day in dal cumèdi Il letto racconta (1960), Amore ritorna! (1961) e Non mandarmi fiori (1964).

In dal 1962 'l à recitâ in dal drama Due settimane in un'altra città, insém a Kirk Douglas e a la Rosanna Schiaffino, e 'l à fat la part 'd òṅ di quàt'r óm ch'i tōś'n in afìt 'n apartamènt par purtàr-'g a tùran la Kim Novak in dla cumèdia Venere in pigiama méntar tri an dòp al s è mis in pagn dal detective Hercule Poirot in dal film Poirot e il caso Amanda (1965).

In di an Stanta a 'l ém vist in dla cumèdia ad Woody Allen Tutto quello che avreste voluto sapere sul sesso* *ma non avete mai osato chiedere mént'r in dal 1982 'l à tòlt part a la cumèdia dramàtica Re per una notte cun Robert De Niro e Jerry Lewis.

A la fiṅ di an Utànta 'l à dâ vita a 'l National Actors Theatre ad New York. In dal 1990 'l à ardupiâ 'l gremlin Brian in Gremlins 2 - La nuova stirpe. Fra i sò ùltim lavōr a 'rcurdém al thriller Fatal Instinct - Prossima apertura (1993), insém a la Sherilyn Fenn e a la Sean Young, e la cumèdia Abbasso l'amore (2003) cun la Renée Zellweger e Ewan McGregor.

'L à laurâ dimóndi da spés anc in televiśiòṅ tulénd part, fra i àtar, a i telefìlm General Electric Theater, Scacco matto, L'ora di Hitchcock, Happy Days, L'impareggiabile giudice Franklin (par quarànta-quàt'r epiśòdi), Con affetto, tuo Sidney (par quarànta-quàt'r puntàdi), La piccola grande Nell e Due papà da Oscar.

Dòp la mòrt dla sò prima mujēr, la Florence Mitchell, in dal 1975 al s è spuśâ cun l'atōra Heather Harlan, ad sinquànt'an più śōvna, ch'la gh'à dâ dū fiōi: la Julia Laurette (1997) e Jefferson Salvini (1998).