Vai al contenuto

Tomas Arana

Da Wikipedia.

C'l artìcul chè 'l è scrit in Miranduléś Emiliàn

Tomas Arana in na figùra dal film Casa a Utóbar Rós (1990)


Thomas Clifford Arana (Auburn, 3 'd Avrìl dal 1955, a s lèś [tɑː'məs əˈrɑːnə] in ingléś) 'l è 'n atōr americàṅ naturaliśâ itagliàṅ.

Biugrafìa

Thomas 'l è carsû a San Francisco in na famìja pòvra, cun dū fradèi e dó surèli più grandi, cun sò pàdar ch'l è andâ via quànd al gh'iva sinc an. A déś an 'l à tacâ a lauràr in un supermarcâ 'd italo-americàṅ par purtàr a cà di bèsi. In séguit 'l à studiâ recitasiòṅ a 'l American Conservatory Theater faghénd al sò debùt cuma atōr in dal 1976 faghénd un pajàs in dla cumèdia televiśìva The Taming of the Shrew trata da 'n lavōr ad William Shakespeare.

In séguit 'l è partî par na vacànsa in Itàglia in du 'l à cgnusû par caś 'l atōr arśàṅ Romolo Valli e la regìsta Lina Wertmüller ch'la 'l à tòlt par far-ag far na part pìcula in dal sò film dal 1978 Fatto di sangue fra due uomini per causa di una vedova. Si sospettano moventi politici (1978), cun prutagunìsta la Sophia Loren, Marcello Mastroianni e Giancarlo Giannini.

Arana 'l è armàś a vìv'r in Itàglia, fra Nàpuli e Róma, recitànd in film cuma la cumèdia śala Giallo napoletano (1979), cun l'Ornella Muti e Michel Piccoli, e 'l drama La pelle (1981) dla regìsta Liliana Cavani, in du 'l à incruśâ su 'l set Burt Lancaster, la Claudia Cardinale e incóra Mastroianni in dla part dal scritōr Curzio Malaparte. Vèrs la mità di an Utànta 'l à laurâ in televiśiòṅ tulénd part a soquànt film TV cuma Tango glaciale, Otello, in dla part ad Iago, e Perfidi incanti, pelìcula a epiśòdi cun Toni Servillo.

Subìt dòp al gh la cava a catàr dal parti più impurtànti cuma qvéla dal campiòṅ ad tuf armàś paraliśâ in dla cumèdia dramàtica Io e mia sorella ad Carlo Verdone, qvéla dal prutagunìsta dal film ad scarésa Il maestro del terrore ad Lamberto Bava, qvéla 'd Làśar in dal film bìblic L'ultima tentazione di Cristo, cun Willem Dafoe in dla part ad Geśù, qvél d'l amànt dla Brigitte Nielsen in dal drama eròtic Domino, qvéla dal bibliutecàri Ewald in dal film ad scarésa La chiesa cun na śōvna Asia Argento e qvéla dal purtēr 'd albêrg in d'l eròtic Intimo cun l'Eva Grimaldi e Leonardo Treviglio.

Da i an Nuànta in avànti i gh śibìsan di rōi anc a Hollywood, tacànd da 'l blockbuster Caccia a Ottobre Rosso (1990), faghénd la part cica ma impurtànta dal cōg rus Loginov su 'l sotamarèṅ “Utóbar Rós”, e pò cuntinuànd cun Guardia del corpo (1992), cun la còpia Kevin Costner/Whitney Houston, c'n al western Tombstone (1993), cun prutagunìsta Kurt Russell e Val Kilmer, c'n al noir L.A. Confidential (1997), filmòṅ cun Kevin Spacey, Russell Crowe, Guy Pearce, la Kim Basinger e Danny DeVito, e c'n al drama Fiore bruciato (1999) insém a la Clea DuVall. In Itàglia a 'l ém vist invéci in La setta (1991), film ad scarésa cun la Kelly Curtis e Giovanni Lombardo Radice scrit e prudót par Dario Argento, e in di thriller Body Puzzle (1992), a fiànc dla Joanna Pacuła, e Bugie rosse (1994), in còpia cun la Gioia Scola.

In di an Dumìla al cuntìnua a far avànti e indrē da 'l Atlàntic, recitànd in dal stòric Il gladiatore (2000), in dla part ad Quìnt a fiànc ad Russell Crowe, in dal film ad guèra Pearl Harbor (2001), cun prutagunìsta Ben Affleck, in dal sentimentàł Chimera (2001), in còpia cun la Iaia Forte, in dla pelìcula 'd asiòṅ Derailed - Punto d'impatto (2002), cun prutagunìsta Jean-Claude Van Damme, in dal thriller cun Matt Damon The Bourne Supremacy (2004), in dal pulisiésc Legami sporchi (2004), e in dal drama Defiance - I giorni del coraggio (2008), insém a Liev Schreiber e a Daniel Craig.

Fra i sò ùltim lavōr a 'rcurdém al thriller ad fantasiénsa Limitless (2011), cun Robert De Niro e Bradley Cooper, al fantàstic Il cavaliere oscuro - Il ritorno (2012), cun Christian Bale in di pagn ad Batman e lò in qvéi dal sò avucàt, Guardiani della Galassia (2014), cun prutagunìsta Chris Pratt méntar lò 'l à fat 'n ambasadōr Kree, al drama stòrig Ustica (2016), in dla part d'l unurévul Fragalà, e 'l dramàtic Napoli - New York ad Gabriele Salvatores.

A ém vist Arana dimóndi da spés anc in série televiśìve o fiction cuma Miami Vice, The Hunger, Walker Texas Ranger, E.R. - Medici in prima linea, Law & Order: Criminal Intent, Senza traccia, CSI: Miami, Crossing Jordan, 24, CSI - Scena del crimine, Rebecca, la prima moglie, Tutti pazzi per amore, 6 passi nel giallo, The New Pope, Imma Tataranni - Sostituto procuratore e Mike, in dla part dal pàd'r ad Mike Bongiorno.

Insém a Christopher Walken e a Matt Dillon 'l à recitâ in dal vìddeo Bad Girl dla Madonna.

Arana, ch'al s definìs 'n óm ad sinìstra ma luntàṅ da la pulìtiga, al gh'à tri fiōi masć.

Filmugrafìa

Culegamènt estéran

Àtar prugèt

Estratto da "https://eml.wikipedia.org/w/index.php?title=Tomas_Arana&oldid=166622"