Vai al contenuto

Tom Hanks

Da Wikipedia.

C'l artìcul chè 'l è scrit in Miranduléś Emiliàn

Tom Hanks tòlt śò in dal 1989


Thomas Jeffrey Hanks, cgnusû méj cuma Tom Hanks (Concord, 9 ad Luj dal 1956, a s lèś [tɑm hæŋks] in ingléś), 'l è 'n atōr, prudutōr, regìsta, senegiadōr e ardupiadōr americàṅ, vinsidōr ad dū Prèmi Òscar cunsecutìṿ, in dal 1994 p'r al drama Philadelphia, in dua 'l iva fat la part d'n avucàt licensiâ da 'l sò studi parchè malâ 'd AIDS, e in dal 1995 par la cumèdia dramàtica Forrest Gump, a fiànc dla Robin Wright e 'd Gary Sinise, ólt'r a àtar quàtar candidadùri p'r i film Big, Salvate il soldato Ryan, al prim di sinc film fat insém a 'l regìsta Steven Spielberg, Cast Away e Un amico straordinario.

In dla sò caréra 'l à vins inóltar sinc Golden Globe, sinc Emmy Award e 'n Ōrs 'd Argìnt a 'l Fèstival 'd Berlîṅ, inólt'r al gh'à na stéla in dla Hollywood Walk of Fame. I sò film i aṅ fat sù da piò ad sinc migliàrd e mèś ad dòlar.

Fra i sò àtar lavōr a 'rcurdém la cumèdia Turner e il casinaro (1989), in di pagn dal detective Scott Turner, al drama Il falò delle vanità (1990), film ad Brian De Palma cun Bruce Willis e la Melanie Griffith, al biugràfic cun la Geena Davis e la Madonna Ragazze vincenti (1992), al drama sentimentàł Insonnia d'amore (1993), in còpia cun la Meg Ryan, al stòric Apollo 13 (1995), insém a Kevin Bacon, Bill Paxton, Gary Sinise e Ed Harris, la cumèdia C'è posta per te (1998), stòria 'd amōr via e-mail sèmpar cun la Meg Ryan.

In di an Dumìla a 'l ém vist in dal biugràfic Prova a prendermi (2002), a fiànc ad Leonardo DiCaprio, Christopher Walken e Martin Sheen, in The Terminal (2004), in dua 'l incróśa la Catherine Zeta-Jones e Stanley Tucci, in dal thriller Il codice da Vinci (2006) e in dal sò séguit Angeli e demoni (2009), in dla part 'd un prufesōr investigadōr.

Lò insém a 'l astrunàuta Jim Lovell e a 'l presidènt Bill Clinton

Fra 'l sò ultmi pelìculi a 'rcurdém al film ad spiunàǵ Il ponte delle spie (2015) e 'l live action Pinocchio (2022), in dla part ad Gepét, persunàǵ dla fòla ad Carlo Collodi Gl'aventùri 'd Pnòć. Stòria 'd un buratèṅ.

Par la televiśiòṅ 'l à tòlt part a soquànt telefìlm cuma Henry e Kip, al sò prim sucès da atōr, Love Boat, Happy Days, Casa Keaton, I racconti della cripta, Dalla Terra alla Luna e Freedom: A History of Us. Cuma ardupiadōr 'l à dâ la vōś a 'l persunàǵ dal sierìf Woody in Toy Story - Il mondo dei giocattoli e in di sò séguit ma anc a la Woody Car in Cars - Motori ruggenti.

Cuma prudutōr 'l à tirâ fóra i bèsi p'r i film Il mio grosso grasso matrimonio greco ad Joel Zwick (2002), Connie e Carla ad Michael Lembeck (2004), Polar Express ad Robert Zemeckis (2004), Ant Bully - Una vita da formica ad John A. Davis (2006), Un'impresa da Dio ad Tom Shadyac (2007), Mamma Mia! ad Phyllida Lloyd (2008), Le mie grosse grasse vacanze greche ad Donald Petrie (2009), Nel paese delle creature selvagge ad Spike Jonze (2009), Greyhound - Il nemico invisibile 'd Aaron Schneider e dimóndi àt'r incóra.

Biugrafìa

[mudéfica la surzéia]

Filmugrafìa

[mudéfica la surzéia]
Ultma fèsta da put (1984)
Al falò dal vanità (1990)
Filadèlfia (1993)
Al schérum velâ (1995)
La guèra 'd Charlie Wilson (2007)

cuma atōr

[mudéfica la surzéia]

cuma regìsta

[mudéfica la surzéia]

Culegamènt estéran

[mudéfica la surzéia]

Àtar prugèt

[mudéfica la surzéia]
Estratto da "https://eml.wikipedia.org/w/index.php?title=Tom_Hanks&oldid=165282"