Tina Aumont

C'l artìcul chè 'l è scrit in Miranduléś

La Marie Christine Aumont (Los Angeles, 14 ad Favràr dal 1946 - Port-Vendres, 28 'd Utóbar dal 2006, a s lèś [ˈtiːnə oʊˈmɔːnt] in ingléś), cgnusùda méj cuma Tina Aumont o dal vòlti anc cuma Tina Marquand da 'l cugnóm ad sò marè, l'è stada n'atōra americàna e francéśa.

L'à tacâ la sò caréra da atōra in di Stat Unî a la mità di an Ssanta c'n al film ad spiunàǵ Modesty Blaise - La bellissima che uccide, cun prutagunìsta la Monica Vitti, Terence Stamp e Dirk Bogarde, e pò cuntinuànd c'n al drama La calda preda, stòria dla relasiòṅ incestuóśa fra Peter McEnery e la sò madrìgna Jane Fonda, e 'l western Texas oltre il fiume in dua lē, ch'la fava la part dn'indiàna Comanche, la vîṅ salvàda da Alain Delon.

In dal 1966 la riva in Itàglia par lauràr cun Alberto Sordi in dal sò film Scusi, lei è favorevole o contrario?, a fiànc dla Silvana Mangano, dla Giulietta Masina, dl'Anita Ekberg, dla Bibi Andersson, dla Paola Pitagora e dla Laura Antonelli e cun Dario Argento in dla part 'd un prēt. La Tina l'armàgn a lauràr in dal „bèl paéś“ p'r àtar quìnd'ś an a 'l incìrca girànd dimóndi film, da spés faghénd la part ad dóni arvèrsi e malnéti, cun 'n erutìśum malisióś.

In dal 1967 a l'ém vista in dal śal Troppo per vivere... poco per morire, in dla part dla Dolly, e in dal western L'uomo, l'orgoglio, la vendetta, in còpia cun Franco Nero, par pò giràr 'l an dòp al grutésc Partner, par la regìa ad Bernardo Bertolucci, e la cumèdia L'urlo ad Tinto Brass.

In séguit l'à fat la maga Circe in Satyricon, la muróśa 'd Massimo Ranieri in dal drama Metello, n'infarméra partiśàna amànta 'd Giuliano Gemma in Corbari, na dóna c'n un bras e na gamba in śés curàda a 'l uśdàł da la Sophia Loren in dal drama Bianco, rosso e..., e la maga Dirce in dal film spurcaciòṅ Racconti proibiti... di niente vestiti, a fiànc dla Janet Agren, ad Rossano Brazzi e dla Barbara Bouchet.

In dal 1973 l'è stada prutagunìsta dal thriller ambintâ a Perùśa I corpi presentano tracce di violenza carnale, insém a la Suzy Kendall e a Luc Merenda, e dal film eròtic Malizia in còpia cun la Laura Antonelli. 'L an dòp l'à catâ spasi in dal drama Fatti di gente perbene cun Giancarlo Giannini e la Catherine Deneuve mént'r in dal 1975 l'è turnàda a lauràr cun Brass in Salon Kitty, incruśànd Helmut Berger e l'Ingrid Thulin, faghénd pò la part dna dunàsa in Il Messia ad Roberto Rossellini.

In dal 1976 la tōś part a tré pelìculi dimóndi impurtànti par la sò caréra. In Cadaveri eccellenti, pulisiésc cun Lino Ventura e Max von Sydow, la fà na putàna, in Nina la lavóra insém a la Liza Minnelli e a l'Ingrid Bergman, mént'r in dal Casanova ad Federico Fellini la fà la part dna ragàsa ch'la fà pèrdar la tèsta a Donald Sutherland in di pagn ad Giacomo Casanova.