Thomas Jane

C'l artìcul chè 'l è scrit in Miranduléś

Thomas Elliott III, cgnusû méj cuma Thomas Jane (Baltimòra, 22 ad Favràr dal 1969, a s lèś [ˈtɑməs ˈdʒeɪn] in ingléś), 'l è 'n atōr e regìsta americàṅ, candidâ par tré vòlti a i Golden Globe par la part dal prutagunìsta Ray Drecker in dla série televiśìva Hung - Ragazzo squillo.

Biugrafìa

'L à fat al sò debùt a 'l cìnema in dal 1987 quànd incóra studènt 'l à girâ 'n film in Ìndia da 'l tìtul Padamati Sandhya Ragam. In séguit 'l à cambiâ 'l sò nóm da Thomas Elliott a Thomas Jane druànd cuma cugnóm al nóm ad sò màdar.

In dal 1992 'l à recitâ in dal film 'd asiòṅ Cyborg - La vendetta, cun prutagunìsta Olivier Gruner, e in Buffy l'ammazzavampiri, pelìcula in dua 'l à incruśâ la Kristy Swanson, Donald Sutherland, Rutger Hauer, Luke Perry, l'Hilary Swank e David Arquette. In dal 1996 'l è stâ starnî da 'l regìsta Tim Pope par far la part dal catìṿ Nemo in Il corvo 2 (1996) cun Vincent Pérez e Iggy Pop.

Sèmp'r in di an Nuànta 'l à catâ spasi in dal drama L'ultima volta che mi sono suicidato (1997), in dla part dal scritōr dla Beat Generation Neal Cassady a fiànc ad Keanu Reeves, in dal film 'd asiòṅ Face/Off - Due facce di un assassino (1997), cun la còpia Nicolas Cage e John Travolta, in dal drama Boogie Nights - L'altra Hollywood (1997), c'n al rōl d'l amìg trufadōr ad Mark Wahlberg e 'd John C. Reilly, in dal drama Amore a doppio senso (1998), a fiànc ad Vincent D'Onofrio, dla Salma Hayek e 'd Ethan Hawke, in dal film ad guèra La sottile linea rossa (1998), cun prutagunìsta Sean Penn, e in dal grutésc Magnolia (1999) in dua 'l à fat la part ad Philip Baker Hall da śōvan.

In dal 2000 'l è in dal cast dal śal Under Suspicion, cun Gene Hackman, Morgan Freeman e la Monica Bellucci, méntar 'l an dòp a 'l ém vist in dal thriller sentimentàł Original Sin cun la còpia Antonio Banderas/Angelina Jolie. In dal 2002 'l à recitâ in dla cumèdia La cosa più dolce, in dla part dal ragàs ch'al fà pèrdar la tèsta a la Cameron Diaz, par pò métar-'s i pagn ad Frank Castle in The Punisher (2004), pelìcula cun John Travolta e Roy Scheider trata da 'n fumét ad sucès dla Marvel Comics.

Dòp avēr laurâ in dal film ad scarésa L'acchiappasogni (2003), Thomas al tórna a recitàr in na pelìcula trata da n'òvra 'd Stephen King in dal 2007 cun The Mist, in dua 'l à fat la part d'l artìsta David Drayton ch'al gh'à da far i cònt cun na fumàna ch'la lóga dal creatùri mustruóśi. Fra i sò ùltim lavōr a 'l cìnema a 'rcurdém al thriller dramàtic White Bird (2014), in dla part dal detective Scieziesciez, al film ad scarésa The Veil - Verità sepolte (2016), cun prutagunìsta la Jessica Alba, 'l aventuróś The Predator (2018), faghénd un suldâ in terapìa ch'al s unìs a Boyd Holbrook par cumbàtar di aglièṅ, e 'l thriller Vendetta (2022), insém a Mike Tyson e a Bruce Willis.

Cuma regìsta 'l à girâ dó pelìculi: Jonni Nitro (1999) e Dark Country (2009).

Thomas 'l è stâ spuśâ cun lʼAysha Hauer, fiōla d'l atōr Rutger Hauer. In dal śugn dal 2006 'l à spuśâ a Venèsia la culéga Patricia Arquette ch'la gh'iva bèla dâ na putìna ciamàda Harlow Olivia Calliope tri an prima. La còpia l'à divursiâ in dal 2011.