Thelma Todd
|
C'l artìcul chè 'l è scrit in
Miranduléś |
La Thelma Alice Todd (Lawrence, 29 ad Luj dal 1906 - Pacific Palisades, 16 ad Dicémbar dal 1935, a s lèś [ˈθɛlmə tɑːd] in ingléś), l'è stada n'atōra americàna, cgnusùda c'n al scutmàj ad „The Ice Cream Blonde“ („Al Ślâ Biónd“). La gh'à na stéla in dla Hollywood Walk of Fame.
Dòp avēr vins al tìtul ad Miss Massachusetts, l'à tacâ na caréra 'd sucès a Hollywood. In ùnd'ś an da atōra, i prim a i tèmp dal cìnema mut, l'à recitâ in sènt-vint òvri a 'l incìrca, fra film e curtumetràǵ, cuma 'l śal Il falcone maltese (1931), cun la Bebe Daniels, e 'l cumèdi slapstick Monkey Business - Quattro folli in alto mare (1931) e I fratelli Marx al college (1932), a fiànc di Fradèi Marx. In Nevada il tiratore dal 1927 l'à laurâ in còpia cun Gary Cooper incruśànd pò Cary Grant in This Is the Night (1932).
Sóta cuntràt c'n al prudutōr Hal Roach, insém a la sò amìga ZaSu Pitts l'à dâ vita a 'n duo còmig ch'al gh'iva da èsar n'aternatìva a la còpia Stan Laurel e Oliver Hardy ch'i aṅ laurâ anc sèg in soquànti pelìculi e curt cuma Non abituati come siamo (1929), Un nuovo imbroglio (1930), I polli tornano a casa (1931), On the Loose (1931), Fra Diavolo (1933) e La ragazza di Boemia (1936), al sò ùltim lavōr da atōra vgnû fóra dòp la sò mòrt. In cal film chè al sò séni i èṅ stadi tajàdi via a part qvéli in du la cantàva un nùmar muśicàł.
Soquànt an prima la Todd l'iva avèrt darènt a Santa Monica un night club risturànt ciamâ Thelma Todd's Sidewalk Cafè insém a 'l sò amànt Roland West, regìsta ch'al l'iva dirèta in dal noir Corsair. I dū i vivìv'n insém a 'l secónd piàṅ dla strutùra insém a la mujēr d'l óm, l'atōra Jewel Carmen, sōl na pòrta a scurimènt la dividìva i dū apartamènt. Al gangster ìtalo-americàṅ Lucky Luciano 'l arév vlû métar lè na sala da śōg minga legàla par ciapàr di bèsi da i śugadōr ric 'd Hollywood ma la dóna la gh'iva dit ad nò.
La matìna dal 16 ad dicémbar dal 1935 la Thelma l'è stada catàda mòrta a vint-nóṿ an in dal garàǵ d'l edifìsi, a 'l intéran dna màchina culōr ciuculàda, mòrta avelenàda da 'l munòsid ad carbòni. Cal fat lè 'l è stâ archiviâ cuma na daśgràsia o 'n suicìdi ma al ròbi i n éran minga tant ciàri a dir dabòṅ. Al sò vistî 'l éra maciâ 'd sànguv e la puśisiòṅ in màchina la n éra minga naturàla, cuma s'la fus stada cuciàda dèntar. Di bijét 'd adìo i n èṅ minga stâ catâ.
Culegamènt estéran
[mudéfica la surzéia]Àtar prugèt
[mudéfica la surzéia]
Wikiquote contiene citazioni di o su Thelma Todd
Wikimedia Commons contiene file multimediali su Thelma Todd
