The Last Sign
|
C'l artìcul chè 'l è scrit in
Miranduléś |
 The Last Sign | ||
 La MacDowell e la Kidder in na figùra dal film | ||
| 'L ùltim ségn 2005 | ||
|---|---|---|
| Regìa: Douglas Law | ||
| Scritōr: Anne Ray-Wendling Ron Base • Heidrun Schleef | ||
| Atōr: Andie MacDowell • Samuel Le Bihan Tim Roth • Margot Kidder • Mimi Kuzyk Tyler Hynes • Amanda Tilson • Lila Bata-Walsh Barry Flatman • Sean Tucker • Cory Bertrand | ||
| Müsica: Pete Lorimer | ||
| Léngua: Ingléś | ||
| Dürä dal film: 91 minüt | ||
| Nasiōṅ: Régn Unî • Cànada • Frància | ||
The Last Sign (ʼL ùltim ségn) 'l è 'n film dramàtic dal 2005 ad Douglas Law trat da 'l racònt “Le Soleil trop tard” dl'Anne Ray-Wendling ch'la firma la senegiadùra insém a Ron Base e a Heidrun Schleef.
La pelìcula, giràda a Montréal, l'è stada 'n flop avénd purtâ a cà setsènt-utantamìla dòlar americàṅ in tut al mónd a frònt 'd un budget ad dagnóra daśnóṿ migliòṅ ad dòlar canadéś.
Sunt
La Kathy MacFarlane (Andie MacDowell) l'è na dóna canadéśa ch'l'à péna pardû sò marè, un mèdag ciamâ Jeremy (Tim Roth) dvintâ puòs e viulènt dòp na misiòṅ in Àfrica, in 'n incidènt in màchina. La fà fadìga a tgnir bòta fra prubléma ecunòmic e na famìja da tiràr sù da par lē, avénd dó fiōli pìculi, la Fiona (Lila Bata-Walsh) e la Maggie (Amanda Tilson), e 'n ragàs più grand, Frank (Tyler Hynes).
Par tiràr avànti e pagàr-'s al mutṿo dla sò vila 'd campàggna l'è custréta a turnàr a lauràr, in un laburatòri chìmig, e a dar in afìt na dépendance dla sò cà a 'n inśgnēr francéś in Cànada par lavōr, Marc (Samuel Le Bihan). Al fat 'l è che la dóna la n gh la cava pròpria minga a mandàr śò la mòrt ad Jeremy e a 'rfàr-as na vita, anc se sò surèla Isabel (Mimì Kuzyk) la vrév ch'la 'l fsis acsè cuma na sò culéga braghéra cun la fisa par 'l eśuterìśum ciamàda Endora (Margot Kidder). Piàn piàṅ la Kathy la taca a davśinàr-'s a Marc ch'l è put e dimóndi amìg di sò fiōi. Purtròp par lē 'l arcòrd ad Jeremy al n la lasa mai esénd che lē la 'l véd dapartùt, anc in di sò sógn.
In séguit la Kathy la taca a ricévar dal telefunàdi anònimi ad nòt, a 'n quàrt 'd óra dòp mèśanòt, 'l uràri d'l incidènt. La dóna la créd ch'a ciamàr a sia 'n ragàs che sò marè 'l iva curâ soquànt tèmp prima, Fergus O'Brien (Cory Bertrand). Quànd la và a cà sua par dir-ag ad mucàr-la, al ragàs al gh cònta ch'l è stâ sò marè a dir-ag ad ciamàr-la tut al siri e ch'al s è tòlt 'l impégn ad dir-ag che Jeremy al vōl èsar pardunâ. La dóna la decìd acsè 'd andàr a dascórar cun sò màdar, lʼEmily (Moira Wylie), par cuntàr-ag che sò fiōl al n gh astà mai sù 'd adòs. La sgnōra la gh rispónd però che sò fiōl 'l è bèla mòrt da siē méś.