The Ice Harvest
|
C'l artìcul chè 'l è scrit in
Miranduléś |
 The Ice Harvest | ||
 La Connie Nielsen in na figùra dal film | ||
| Al racòlt dal giàs 2005 | ||
|---|---|---|
| Regìa: Harold Ramis | ||
| Scritōr: Richard Russo Robert Benton • Scott Phillips | ||
| Atōr: John Cusack • Billy Bob Thornton Connie Nielsen • Lara Phillips • T.J. Jagodowski Bradley Grant Smith • Bill Noble • Mike Starr Meghan Maureen McDonough • Oliver Platt William Dick • Frank Gallo • Randy Quaid Tab Baker • David Pasquesi • Ned Bellamy | ||
| Müsica: David Kitay | ||
| Léngua: Ingléś | ||
| Dürä dal film: 92 minüt | ||
| Nasiōṅ: Stat Unî | ||
The Ice Harvest (Al racòlt dal giàs) 'l è 'n thriller americàṅ dal 2005 'd Harold Ramis. La part dla Renata, pò andàda a la Connie Nielsen, l'éra stada pinsàda par la Monica Bellucci che però l'è stada custréta a tiràr-'s indrē parchè in alóra la gh'iva 'd avēr la Deva Cassel.
'L à muciâ sù déś migliòṅ ad dòlar a 'l incìrca a frònt 'd un budget ad sédas.
Sunt
[modifica | mudéfica la surzéia]L'è la vigìglia 'd nadâł a Wichita (Kànsas). Charlie Arglist (John Cusack) al fà 'l avucàt p'r al boss mafióś Bill Guerrard (Randy Quaid). Na vòlta 'l éra spuśâ cun la Sarabeth (Justine Bentley) ma adès chi lē la s è misa c'n al sò amìg Pete Van Heuten (Oliver Platt). Vic Cavanaugh (Billy Bob Thornton) 'l è 'n àtar sò amìg, spuśâ cun la Gladys (Lindsay Porter), ch'al gh'à di strip club in dla sità cuma 'l Sweet Cage purtâ avànti par la Renata Crest (Connie Nielsen), al sógn segrét ad Charlie. Chi lò 'l à péna purtâ via a 'l sò cap dū migliòṅ ad dòlar ficâ in un bursòṅ mis via da Vic ch'l è 'd acòrd sèg avénd strulgâ insém al piàṅ.
Prima 'd lasàr la sità, Charlie al prumét a la Renata ad catàr e pò purtàr-ag na fóto ad lē ch'la gusàva c'n un pulìtig dal pòst, Williams (David Pasquesi), in manéra 'd psēr-la druàr cónt'r ad lò cuma ricàt in dal caś ch'al vlis far-ag saràr al sò lucàl. In cal méntar però Roy Gelles (Mike Starr), 'n óm ad Guerrard, al gh'è adòs par via di bèsi ch'al gh'à fargâ.
Quànd 'l avucàt al và a cà 'd Vic, al cata la Gladys mòrta masàda davànti a 'l àlb'r ad Nadâł pò a 'l impruvìś a riva 'l sò sòci ch'al gh diś 'd avēr mis Gelles incóra viṿ in un baùl, dòp ch'l iva fat fóra sò mujēr, e che lò al gh'à da jutàr-'l a purtàr-'l in màchina in dal lâg tut giasâ lè darènt. Lung la via Gelles, da dènt'r al baùl, al diś a Charlie ch'a masàr la dóna 'l è stâ Vic in parsòna e ch'al farà àtar tant cun lò a la fîṅ par tgnir-'s i bèsi tut lò.
Charlie e Vic i rìv'n a 'l lâg, tirànd-'s adrē al baùl par lugàr-'l in dl'àqua. A 'l impruvìś Gelles al spara 'n cōlp bcand Vic in dla pansa ma chi lò al gh la cava a sparàr-'g a sò vòlta cupànd-al, finénd però subìt dòp in àqua. Esénd frî Vic al n gh la cava minga a vgnir fóra da 'd là, al dmanda ajùt a Charlie che però al decìd ad lasàr-al murìr anc parchè a gh'è vgnû 'l dubi che Gelles al l'is cuntàda giùsta. Sicûr ad psēr tgnir-'s i dū migliòṅ, Charlie al vèra 'l bursòṅ ad Vic ma 'l s rénd cònt ch'l è vōd.
'L avucàt al próa a turnàr da la Renata, la dóna ch'l à sèmp'r amàda, sénsa savēr però che chi lē la s éra bèla misa 'd acòrd cun Vic, i bèsi la gh i à lē.