The Grudge

Da Wikipedia.
C'l artìcul chè 'l è scrit in Miranduléś Emiliàn
Video-x-generic.svg The Grudge
The Grudge
Grudge.png
La Sarah Michelle Gellar in na figùra dal film
Rancōr
2004
Regia: Takashi Shimizu
Scritùr: Takashi Shimizu • Stephen Susco
Atùr: Sarah Michelle GellarClea DuVallKadee Strickland
Grace ZabriskieRosa BlasiWilliam MapotherJason Behr
Müsica: Christopher Young
Dürä dal film: 96 minüt
Lengua: Inglés


«
A n daśméndga e a n pardòna minga.»
(Tag-line dal film)


The Grudge (Rancōr) 'l è 'n film ad scarésa dal 2004 ad Takashi Shimizu, arfacimènt dal film dal 2003 Ju-on: Rancore dal stés regìsta giapunéś, (呪怨).

C'n un cōst ad sōi déś migliòṅ ad dòlar, la pelìcula l'à frutâ dimóndi a i prudutōr Sam Raimi e Robert Tapert parchè l'à muciâ sù un quèl cuma sènt-utantasèt migliòṅ ad dòlar.

Al film al gh'à abû dū séguit: The Grudge 2 dal 2006 e The Grudge 3 dal 2009.

Sunt

Al prufesōr americàṅ Peter Kirk (Bill Pullman), ch'al viṿ in Giapòṅ insém a sò mujér, un dè al decìd ad butàr-as śò par na fnèstra, masànd-as sénsa mutìṿ. Dū an dòp na śóvna asistènta suciàla dal pòst, la Yoko (Yôko Maki), la và a cà dna vècia ucidentàla ch'la gh'à dimóndi prubléma ad salùt, l’Emma Williams (Grace Zabriskie). Chi lē la viṿ da par lē dòp che sò fiōl e sò nóra i èṅ sparî. Méntar la śóvna la dà śò la pólvra e la fà i fat, la sènt di stus in dal tasèl mòrt e la và sù a guardàr cuś a gh'è. Tut 'd un trat un putèṅ malfurmâ e śmòrt al la ciàpa sù ad pēs masànd-la.

A n avénd più nutìsi ad lē, par tgnir a drē a la vècia, Alex (Ted Raimi) a 'l sò pòst al gh manda na śóvna americàna ch'l'è drē a studiàr là p'r un scambi culturàl, la Karen Davis (Sarah Michelle Gellar). Sèg la gh'à 'l sò muróś Doug (Jason Behr).

Al prim dè ad lavōr la Karen la cata la cà insprucàda, rusc in gir e pólva, cuma se ninsòṅ 'l is fat gnint par di dè e l’Emma l'è in un stat catatònic. Dòp avér-la mis a lèt, la taca a mét'r a pòst quànd la sènt anca lē di ciòc daśvgìr da 'l tasèl. In na cambra la cata 'n armàri sarâ cun dal nàst'r adeśìv: i stus e i sîg i rìvan da lè dèntar. Vèrt al spurtèl, a salta fóra un putèṅ da la pèla biànca e cun un gat négar in bras. Chi lò al gh diś ad ciamàr-as Toshio (Yuya Ozeki) ma, sénsa spiegasiòṅ, al sparìs cuma 'l è vgnû.

Culegamènt estéran