The Door in the Floor
|
C'l artìcul chè 'l è scrit in
Miranduléś |
 The Door in the Floor | ||
 La Kim Basinger in na figùra dal film | ||
| 'L us in dal paimènt 2004 | ||
|---|---|---|
| Regìa: Tod Williams | ||
| Scritōr: John Irving • Tod Williams | ||
| Atōr: Jeff Bridges • Kim Basinger • Jon Foster Elle Fanning • Larry Pine • John Rothman Mimi Rogers • Bijou Phillips • Harvey Loomis Louis Arcella • Donna Murphy • Robert LuPone | ||
| Müsica: Marcelo Zarvos | ||
| Léngua: Ingléś | ||
| Dürä dal film: 111 minüt | ||
| Nasiōṅ: Stat Unî | ||
The Door in the Floor (ʼL us in dal paimènt) 'l è 'n film dramàtic americàṅ dal 2004 ad Tod Williams trat da 'l rumànś Védva par 'n an dal 1998 ad John Irving. Custâ sèt migliòṅ e mèś ad dòlar, al film al 'n à pò muciâ sù siē e sèt.
Sunt
Al scritōr ad lìbar par putèṅ e pitōr Ted Cole (Jeff Bridges) al viṿ a Long Island insém a sò mujēr Marion (Kim Basinger) e a la sò putìna Ruth (Elle Fanning) mént'r i sò dū fiōi masć, Thomas (Tod Harrison Williams) e Timothy (Carter Williams) ad darsèt e 'd quìnd'ś an, i èṅ mòrt 'l an prima. A dar na maṅ a la còpia a gh'è na babysitter piutòst śōvna, lʼAlice (Bijou Phillips), e da pôc anc un ragàs ch'al vrév far al scritōr anc lò, Eddie O'Hare (Jon Foster), ch'al juta i Cole scarusànd in gir al padròṅ 'd cà, ch'al n gh'à minga la patènt, e scrivénd cun la màchina da scrìvar i tèst 'd un racònt che Ted 'l è drē a butàr śò.
Dòp al lut ch'l à culpî la còpia, al rapòrt fra marè e mujēr 'l è in criśi tant ch'i dū i decìd'n ad separàr-as, vivénd a turàn òṅ in dla cà cun la Ruth e c'l àt'r in 'n apartamènt tòlt in afìt in sità. Méntar Ted al s pasa 'l tèmp faghénd di diśégn a na dóna ch'la gh fà da mudèla nûda, lʼEvelyn Vaughn (Mimi Rogers), la Marion la taca na relasiòṅ ad sès cun Eddie.
Al ròbi i vàn'n avànti acsè par na quàlc stmana in fîṅ tant ch'la Ruth la bèca i dū amànt ciulàr in dla cambra da lèt, cuntànd incòsa a sò pàdar. Piutòst che pasàr par na màdar “dunàsa” la Marion la decìd 'd ès'r arcurdàda da sò fiōla cuma na màdar ch'la n gh'è minga. Un dè la partìs par sèmpar purtànd-as via tut al fóto di sò fiōi e anc i negatìṿ. I rapòrt in dla cà di Cole i s ruìnan subìt dòp: lʼAlice la s licénsa, Ted al para via lʼEvelyn sénsa spiegasiòṅ, cuma s'la fus 'n fèr vèć, e pò al decìd ad far àtar tant cun Eddie, dòp avēr-ag cuntâ cuś a fus sucès dabòṅ al dè dla mòrt di sò fiōi. Armàś sōl in cà, insém a 'l giardinēr Eduardo Gomez (Louis Arcella) ch'l à péna tòlt a lauràr par lò, Ted al vèra n'arbàlta in dal paimènt e al gh sparìs dèntar.