The Clown at Midnight
|
C'l artìcul chè 'l è scrit in
Miranduléś |
 The Clown at Midnight | ||
 La Tatyana Ali in na figùra dal film | ||
| Al pajàs a meśanòt 1998 | ||
|---|---|---|
| Regìa: Jean Pellerin | ||
| Scritōr: Kenneth J. Hall | ||
| Atōr: Christopher Plummer • Melissa Galianos Margot Kidder • Sarah Lassez • James Duval Tatyana Ali • J.P. Grimard • Vicki Marentette Ryan Bittle • Liz Crawford • Jonathan Barrett | ||
| Müsica: Glenn Buhr | ||
| Léngua: Ingléś | ||
| Dürä dal film: 91 minüt | ||
| Nasiōṅ: Cànada | ||
The Clown at Midnight (Al pajàs a meśanòt), cgnusû in Itàglia anc c'n al tìtul 'd Ultimo atto, 'l è 'n film ad scarésa canadéś dal 1998 ad Jean Pellerin, girâ a Winnipeg in dla pruìnsa dal Manitòba c'n un budget ad dódas migliòṅ ad dòlar.
Sunt
[mudéfica la surzéia]La Kate Williams (Sarah Lassez) l'è na studènta dna scóla superiōra ch'la frequénta insém a la sò amìga Monica (Tatyana Ali). Da pôc l'à savû 'd èsar stada adutàda parchè quànd l'éra pìcula sò màdar Lorraine Sedgewick (Vicki Marentette), cantànta lìrica, l'éra stada cupàda a scurtlàdi in dal sò camarèṅ da 'n óm vistî da pajàs. A s pénsa ch'a fus stâ 'l sò culéga e amànt Lorenzo Orsini (Jonathan Barrett), ch'insém a lē al fava a teàtar l'òvra dramàtica Pagliacci ad Ruggero Leoncavallo, anc parchè dòp al masamènt chi lò 'l è sparî.
La Monica la dmanda a la sò amìga, ch'l'è dimóndi śò, ad jutàr-la a mét'r a pòst al teàtar in du l'éra stada masàda sò màdar, ch'l è stâ bandunâ dòp cal brut fat ad sangṿ lè. I s śònt'n anc di sò cumpàgn ad scóla, la Cheryl Webber dita Walnut (Melissa Galianos), al gay Marty (J.P. Grimard), 'l arvèrs e misterióś George (James Duval), la biónda e minga tant gustóśa Ashley (Liz Crawford) e 'l sò muróś spurtìṿ Taylor (Ryan Bittle), tut a i órdan dl'insgnànta Ellen Gibby (Margot Kidder).
Méntar chi lē l'è drē a dascórar da 'l palc, na luś ad séna la casca śò da 'l élt e par pôc la n la bèca. Tut i pénsan ch'a sia stâ 'n incidènt par caś ma pò a riva lè al prupietàri dla strutùra, al sgnōr Caruthers (Christopher Plummer), ch'al diś ch'al teàtar 'l è maladî e che lè dènt'r a gh gira 'l spìrit dla Lorraine. La Kate, sinténd un quèl dal gènar su sò màdar, la scapa via in làgarmi ma pò a riva la sgnōra Gibby a dar-ag cunfòrt.
Mént'r i ragàs i tàc'n a lauràr par pulìr e mét'r a pòst al teàtar, 'n óm trucâ da pajàs al taca a far-i fóra òṅ a òṅ.