The Boy (film 2016)
|
C'l artìcul chè 'l è scrit in
Miranduléś |
 The Boy | ||
 Evans e la Cohan in na figùra dal film | ||
| Al ragàs 2016 | ||
|---|---|---|
| Regìa: William Brent Bell | ||
| Scritōr: Stacey Menear | ||
| Atōr: Lauren Cohan • Rupert Evans • Jim Norton James Russell • Diana Hardcastle • Ben Robson Jett Klyne • Matthew Walker • Lily Pater | ||
| Müsica: Bear McCreary | ||
| Léngua: Ingléś | ||
| Dürä dal film: 97 minüt | ||
| Nasiōṅ: Stat Unî • Cànada • Cina | ||
The Boy (Al ragàs) 'l è 'n thriller dal 2016 ad William Brent Bell.
Custâ déś migliòṅ ad dòlar, al 'n à pò frutâ da piò ad ssanta-quàtar. Al gh'à abû 'n séguit in dal 2020, The Boy - La maledizione di Brahms.
Sunt
[mudéfica la surzéia]La Greta Evans (Lauren Cohan) l'è na ragàsa americàna dal Muntàna ch'la decìd 'd andàr a far la badànta in Inghiltèra p'r un baghét 'd òt an ciamâ Brahms (Jett Klyne), a cà dna famìja cun di bèsi, i Heelshire. In cla manéra chè la pudrà métar-'s quèl in bisàca ma specialmènt anc śluntanàr-as da 'l sò èx muróś viulènt, Cole (Ben Robson), ch'a fòrsa 'd dar-ag dal bòti al gh'à fat pèrd'r al putèṅ ch'i gh'ìvan d'avēr insém.
Rivàda in dla vila in du la gh'à da sarvìr, la sgnōra Heelshire (Diana Hardcastle) la gh diś qvél ch'la gh'à da far a la létra tut i dè: cambiàr sò fiōl, dar-ag da magnàr, cuntàr-ag dal fòli e dal pueśìi, far-ag scultàr di disc ad mùśica clàsica e pò purtàr-'l a lèt dand-'g al baśèṅ dla bòna nòt. Quànd però la dóna la gh preśénta sò fiōl a s véd ch'l è 'n bambulòt ad purslàna. In séguit i Heelshire i partìsan par na vacànsa ad dó stmani ma a dir dabòṅ i vànan via par tōr-as la vita, andgànd-as.
La Greta l'armàgn da par lē in dla vila cun la bàmbula 'd Brahms che però lē la mét da na banda quaciànd-al c'n un pandèṅ. Dal vòlti a riva lè un ragàs ciamâ Malcolm (Rupert Evans), pagâ da i Heelshire par purtàr da magnàr e chi lò al s fà amìg cun la Greta. A 'l impruvìś però i tàc'n a sucédar di fat strâṅ: la ragàsa l'àrmàgn srada dènt'r a 'l tasèl mòrt dòp che l'arbàlta la s éra fata sù a scat, un sò vistî rós e na cadnìna i sparìsan méntar lē l'éra drē a far-as na dócia e pò a gh'è Brahms che da vòlti al vîṅ catâ spustâ sénsa spiegasiòṅ.
Na nòt la Greta la sènt na vōś ch'al la ciàma: 'l è Brahms ch'al gh lasa 'n sandwich fóra da 'l us. L'americàna, spavintàda, la dascór cun Malcolm ch'al gh diś ch'al putèṅ 'l éra mòrt in dal fōg vint an prima in dal dè dal sò cumpleàn e che na vòlta al sgnōr Heelshire (Jim Norton) al gh'va dit che sò fiōl 'l éra strâṅ.