The Bourne Identity
|
C'l artìcul chè 'l è scrit in
Miranduléś |
 The Bourne Identity | ||
 Damon e la Franka Potente in na figùra dal film | ||
| L'identità ad Bourne 2002 | ||
|---|---|---|
| Regìa: Alan J. Pakula | ||
| Scritōr: William Blake Herron Tony Gilroy • Robert Ludlum | ||
| Atōr: Matt Damon • Franka Potente • Clive Owen Chris Cooper • Adewale Akinnuoye-Agbaje Brian Cox • Walton Goggins • Josh Hamilton Julia Stiles • Orso Maria Guerrini • Gabriel Mann | ||
| Müsica: John Powell | ||
| Léngua: Ingléś • Francéś Tedésc • Ulandéś • Yoruba | ||
| Dürä dal film: 119 minüt | ||
| Nasiōṅ: Stat Unî • Germàgna Repùblica Céca • Grécia | ||
The Bourne Identity (L'identità ad Bourne) 'l è 'n thriller 'd asiòṅ dal 2002 ad Doug Liman trat da 'l rumànś Un nome senza volto ad Robert Ludlum (1980). Al gh'à abû tri séguit: The Bourne Supremacy (2004), The Bourne Ultimatum - Il ritorno dello sciacallo (2007) e Jason Bourne (2016) e 'n spin-off da 'l tìtul The Bourne Legacy (2012) cun prutagunìsta Jeremy Renner.
Custâ ssanta migliòṅ ad dòlar, al film al 'n à pò muciâ sù duśènt-quatórdas.
Sunt
Salvâ in dal mâr Mediteràni da 'n pescadōr ciamâ Giancarlo (Orso Maria Guerrini), Jason Bourne (Matt Damon) al s déśda sénsa memòria dòp che c'l àtar al gh'à tirâ via dū prujètil da la schina. Par savēr chi 'l è dabòṅ, Bourne al và a 'l indirìs ch'a salta fóra da 'n chip sótpèla ch'al gh'à in dal còrp, na banca 'd Śurîg in du 'l gh'à cònt curènt e in du gl'impiegâ a 'l spurtèl i 'l arcgnósan. Lè al vèra na caséta 'd sicurésa in du 'l cata soquànt pasapòrt intestâ a lò cun di nóm difarènt e 'n muć ad bèsi in cuntànt.
Vdénd ch'la sò patènt la gh'à 'n indirìs francéś, 'l óm al decìd 'd andàr a Parì in dua a gh'arév da ès'r al sò apartamènt. Al s fà scarusàr in màchina in cambi ad bèsi da na ragàsa tedésca ciamàda Marie Helena Kreutz (Franka Potente).
Rivâ a destinasiòṅ, 'l óm al scampa a 'n tintatìṿ ad masamènt da part d'n agìnt segrét ciamâ Castel (Nicky Naudé) che però quànd al gh'à la pèś sèg al decìd ad butàr-'s ad sóta. Cun la pulisìa ch'la gh dà la casa, Bourne e la Marie i èṅ custrét a scapàr via.
In cal méntar Alexander Conklin (Chris Cooper), respunsàbil dn'urganiśasiòṅ segréta americàna, al decìd far masàr Nykwana Wombosi (Adewale Akinnuoye-Agbaje), èx ditadōr africàṅ in eśìli in Frància, ch'l è prònt a vudàr al sac su i ligàm dla CIA c'n i afâr intéran dal sò paéś. A cupàr-'l a gh pénsa 'n sicàri cgnusû cuma “Al Prufesōr” (Clive Owen). Al sò còmpit sucesìṿ 'l è qvél ad masàr anc Bourne.