The Artist (film)
|
C'l artìcul chè 'l è scrit in
Miranduléś |
 The Artist | ||
.png) Al caṅ Uggy e Jean Dujardin in na figùra dal film | ||
| ʼL Artìsta 2011 | ||
|---|---|---|
| Regìa: Michel Hazanavicius | ||
| Scritōr: Michel Hazanavicius | ||
| Atōr: Jean Dujardin • Bérénice Bejo John Goodman • James Cromwell • Missi Pyle Penelope Ann Miller • Ed Lauter • Beth Grant Joel Murray • Ken Davitian • Malcolm McDowell | ||
| Müsica: Ludovic Bource | ||
| Léngua: Ingléś • Francéś | ||
| Dürä dal film: 100 minüt | ||
| Nasiōṅ: Frància • Bélgi | ||
The Artist (ʼL Artìsta) 'l è 'n film mut americàṅ dal 2011 ad Michel Hazanavicius girâ in biànc e négar, candidâ a déś Prèmi Òscar e vinsidōr ad sinc statṿi: film, regìa, atōr prutagunìsta, custùm e culòna sunóra, in dua a s cata na part ad qvéla scrita da Bernard Herrmann par La donna che visse due volte, un quèl dimóndi criticâ da la prutagunìsta dal film 'd Hitchcock Kim Novak ch'la s è sintìda “viulentàda” a sò dita. Al regìsta 'l à rispòst ch'la sò òvra l'éra 'n umàǵ a 'l cìnema e ch'al gh'iva 'l parmés par far-al, avénd pagâ i dirìt.
La pelìcula l'è stada preśentàda in cuncōrs a 'l 64śum Fèstival ad Cannes in du al prutagunìsta Jean Dujardin 'l à vins al Prix d'interprétation masculine. Custâ quìndas migliòṅ ad dòlar, al film al 'n à pò muciâ sù da piò ad sènt-trentatri.
Sunt
[mudéfica la surzéia]In dal 1927 a Hollywood George Valentin (Jean Dujardin) 'l è na stéla dal cìnema mut. Un dè, a la prima 'd un sò film, al vîṅ tòlt śò da 'n futógrafar insém a na sò amiradōra ciamàda Peppy Miller (Bérénice Bejo), na ragàsa ch'la sà balàr e ch'la vrév dvintàr atōra anc lē. La fóto la finìs su 'l giurnàl Variety e 'l prudutōr Al Zimmer (John Goodman) al decìd ad tōr-la cuma cumpàrsa parchè la sà balàr bèṅ.
Valentin al s la cata in dal cast dal film nóṿ ch'al gh'à da giràr, soquànti séni ch'i èṅ abàsta par far védar ch'i dū i lavóran bèṅ insém tant ch'i s fàn'n amìg. Dū an dòp Zimmer 'l è prònt par pasàr a i film sunôr ma Valentin al gh rid in fàcia parchè lò al nè minga 'n buratèṅ ma 'n artìsta. In tut al manéri par Zimmer la Peppy l'è la ragàsa giùsta méntar Valentin al n è più bòṅ, esénd tròp abituâ a recitàr faghénd di bèc e dal śmòrfi, inólt'r al pùblic al vōl dla gint nóva e 'l pùblic al gh'à sèmpar ragiòṅ.
Valentin al decìd ad far tut da par lò, girànd un film a la vècia manéra impgnànd dimóndi di sò bèsi. Purtròp par lò al film 'l è 'n flop a 'l cuntràri ad qvél dla Peppy ch'l è 'n sucès. Finî in buléta e lasâ da sò mujēr, la Doris (Penelope Ann Miller), Valentin 'l è custrét prima a impgnàr i sò vistî, pò quànd al finìs in falimènt al decìd ad licensiàr al sò majurdòm (Ed Lauter) parchè al n gh'iva più bèsi par pagàr-al.
La Peppy la vrév jutàr-al ma Valentin 'l è tròp vilî tant ch'al pénsa 'd tōr-as la vita.