The Air I Breathe
|
C'l artìcul chè 'l è scrit in
Miranduléś |
 The Air I Breathe | ||
 Brendan Fraser in na figùra dal film | ||
| L'ària ch'a tir fiâ 2007 | ||
|---|---|---|
| Regìa: Jieho Lee | ||
| Scritōr: Jieho Lee • Bob DeRosa | ||
| Atōr: Brendan Fraser • Sarah Michelle Gellar Andy Garcia • Kevin Bacon • Forest Whitaker Julie Delpy • Clark Gregg • Emile Hirsch Kelly Hu • Evan Parke • Jon Bernthal Victor Rivers • Taylor Nichols • Cecilia Suárez | ||
| Müsica: Marcelo Zarvos | ||
| Léngua: Ingléś • Spagnōl | ||
| Dürä dal film: 95 minüt | ||
| Nasiōṅ: Stat Unî • Mèsic | ||
«
Dal vòlti al ròbi ch'a n psém minga cambiàr... i finìsan par cambiàr nuàtar.»
(Tagline dal film)
The Air I Breathe (L'ària ch'a tir fiâ) 'l è 'n film dramàtic americàṅ e mesicàṅ dal 2007 ad Jieho Lee girâ a Sità dal Mèsic.
La pelìcula, ch'l'à fat sù dū migliòṅ e siē ad dòlar a frònt 'd un cóst ad déś, la cònta 'l vicéndi ad quàtar persunàǵ ch'i n s cgnósan gnanc ma c'n al sò viti i s incróś'n in paralēl par caś. Chi lōr i n gh'ànan briśa di nóm precìś ma i èṅ ciamâ Cuntintésa, Piaśēr, Vilimènt e Amōr cuma i quàtar pilàstar dgl'emusiòṅ d'n antìg pruvèrbi cinéś. Al film 'l è divìś pròpria in quàtar segmènt in manéra 'd cuntàr la vita di quàtar prutagunìsta, c'n al persunàǵ 'd Andy Garcia (Dida) ch'l unìs tut i fat.
Sunt
[mudéfica la surzéia]- Epiśòdi Cuntintésa. Cuntintésa (Forest Whitaker), impiegâ 'd banca, méntar 'l è a 'l cèso in un bagn pùblic al sènt par caś soquànt sugèt dascórar dna gara 'd cavài trucàda in du a pâr ch'al gh'àppia da vìns'r al cavàl Butterfly. Esènd la parpàja anc la sò bèstia preferìda, al decìd ad scumét'r un muć ad bèsi, sinquànta-mila dòlar, ch'al dmanda in prèst parchè al n gh i à minga. Quànd al cavàl al pèrd, p'r èsar strabucâ par tèra méntar 'l éra drē a vìnsar, al strusèṅ ch'al vansa i bèsi da lò 'l al fà purtàr in un magaśèṅ in du lò al dà dal bòti a la gint ch'la n paga minga, dand-ag na stmana par métar-'s in para o sinò al gh tajàra via i dî dal maṅ, difàti 'l è cgnusû c'n al scutmàj ad Dida (Andy Garcia). 'L óm al vrév scapàr via da la sità ma 'l gh'à 'n óm ch'al gh tîṅ sèmp'r adrē, Piaśēr (Brendan Fraser). Chi lò al gh ślunga na pistòla che Cuntintésa al dróa par far na ladrarìa in banca. Dòp avēr mis tut i bèsi in na bórsa, al próa a scapàr via a pē p'r andàr in aeropòrt ma 'l vîṅ mis sóta da na màchina lung la strada. 'L óm, ch'al n s è fat gnint, al pòrta via 'n muturèṅ a 'n ragàs ch'al s éra farmâ par védar s'al s stava bèṅ, pò al riva a 'l aeropòrt in dua però al cata i óm dla pulisìa. Quànd al buta via 'l bursòṅ c'n i bèsi, i pulisiòt i gh spàran tut insém, masànd-al. Quànd al sò còrp al cróda par tèra c'n i sò bras dastéś, al sò capòt al sa ślarga, faghénd-al simbràr na parpàja.
- Epiśòdi Piaśēr. Piaśēr, sicàri ad mistēr, 'l è bòṅ ad savēr al futûr dal parsòni ch'l incróśa vdénd dal figùri in dla sò mènt ad qvél ch'a gh sucedrà, un quèl ch'al gh'à fîṅ da pìcul quànd durànt un śōg 'l iva vist murìr al sò fradlèṅ cascànd par tèra a 'l indrē. Adès al lavóra p'r al strusèṅ Dida ch'l al ciàma par far-ag far un gir insém a sò anvōd Tony (Emile Hirsch), un ragàs ch'l è péna rivâ in sità, in dal méntar ch'al và a dmandàr i bèsi a la gint ch'la n à incóra pagâ i sò dèbit, acsè da psēr imparàr al mistēr. In dal méntar, al gh fà véd'r e sintìr un CD dna sèrta Trista (Sarah Michelle Gellar), na cantànta a 'l sò debùt ma minga tant trista ligàda a 'n manager in débit sèg, al sgnōr Parks (William Maier), e dònca dispòst a cédar-'g al cuntràt cun lì lē. Piaśēr al pòrta 'l ragàs sèg p'r òṅ di sò gir ad nòt p'r andàr a spavintàr e a piciàr i debitōr, finénd pò in un night club. Piaśēr, ch'al gh'à da finìr i sò lavursèṅ, al vōl ch'al śōvan 'l armàgna lè parchè al gh'à abû na viśiòṅ ad Tony in perìcul e intrigâ atàc a na ramàda in dal méntar ch'l éra drē a saltàr da 'd là. Dòp èsar finî a lèt cun dó putàni, al ragàs al gh'à na discusiòṅ cun na ragàsa drugàda ch'la gh'iva na pistòla in maṅ. Par śbali a partìs un cōlp ch'al ferìs un vèć mafióś. Piaśēr al ciàpa 'l śuvnòt par scapàr via insém e in prèsia parchè i óm dal mafióś i vōlan far-'g-la pagàr. In trapla davànti a la ramàda, Tony al gh la cava a saltàr da cl'atra banda méntar Piaśēr invéci nò e acsè al s ciàpa un muć ad bòti e 'd cals finénd acsè a 'l uśdàł in dua 'l è curâ da 'l dutōr Amōr (Kevin Bacon).
- Epiśòdi Vilimènt. Vilimènt da pìcula l'à vist sò pàdar (Taylor Nichols) murìr finénd sóta na màchina in na giurnàda 'd piōva. Adès ch'l'è na śuvnòta l'à tacâ a lauràr in dal mónd dal spetàcul faghénd la cantànta e balarìna e l'à péna publicâ 'n àlbum druànd al nóm 'd art ad Trista. Al sò manager Parks 'l è finî in buléta e 'l sò cuntràt 'l è pasâ a Dida, un quèl ch'a la ragàsa a n gh piàś pròpria par gnint parchè la n gh'à minga intensiòṅ ad lauràr sèg in tut al manéri la gh'à da mandàr śò al ròsp. Durànt n'intervìsta in televiśiòṅ cun 'n intervistadōr minga tant gustóś (Jon Bernthal) ch'al gh'iva dmandâ cuśa la gh'is ad speciàł, la Trista, ch'la n sà minga csa dir, la salta sù ch'la gh'à 'n sànguv dimóndi râr, dal grup Kp(ab-). Dòp avēr cgnusû Piaśēr, ch'al s è armìs da 'l bòti ch'l iva ciapâ da di mafióś, chi lò al decìd ad lugàr-la a cà sua saénd ch'l è 'l ùnic pòst in dua Dida al n vgnarà mai a pascàr-la. I dū i finìs'n anc a lèt e la ragàsa l'armàgn insìnta. Quànd Dida al vîṅ a savēr par caś che la cantànta la s cata a cà dal sò sicàri, al decìd ad masàr-al par via dal sò tradimènt, pò l'órdna a la Trista 'd aburtìr parchè la gh'à la caréra da purtàr avànti e la gh'à da far di bèsi.
- Epiśòdi Amōr. Amōr 'l è 'n dutōr ch'al lavóra in 'n uśdàł insém a i sò culéga Henry (Clark Gregg), sò amìg da i tèmp dl'università, e la Gina (Julie Delpy). Chi lōr dū i èṅ spuśâ e Amōr al n gh'à mai abû 'l curàǵ ad dir a lò dóna ch'l éra inamurâ 'd lē quànd al psiva incóra far-'s avànti sèg in fîṅ tant ch'l'éra puta. Un dè, méntar l'è drē a cavàr via dal vlèṅ da i dènt 'd un sarpènt, la Gina la vîṅ murśgàda da 'l rètil, andànd in a risć ad murìr parchè in dla strutùra a n gh'è minga 'n contravelèṅ prònt. Al prubléma 'l è ch'la dutōra la gh'à anc un gèn'r ad sànguv particulàr, dal sachi par dal trasfuśiòṅ a n gh 'n è minga. Amōr 'l è angustiâ parchè al n sà minga cuśa far, pò al sènt par caś in televiśiòṅ ch'a gh'è na cantànta, la Trista, ch'la gh'à 'n sànguv cumpàgn a qvél ch'a gh sarvìs. 'L óm al partìs subìt p'r andàr a dascórar cun Vilimènt ma al la bèca insìma a 'n palàs esénd ch'la vōl butàr-as śò parchè la sò vita l'è parśunēra di vlēr ad Dida. Al dutōr al gh la cava a 'l ùltim a salvàr la vita a la Trista, ciapànd-la p'r un bras, e dònca anc a la Gina, méntar la cantànta la decìd ad scapàr via da Dida andànd a 'l èstar tulénd 'n aparéć. Méntar l'è drē a 'ndàr a 'l aeropòrt la mét sóta 'n óm ch'l iva péna fat na ladrarìa in banca. Rivàda a 'l aeropòrt, la sènt un ciòc su 'l téǵ dna màchina: qualchidòṅ 'l à butâ via un bursòṅ pîṅ 'd bèsi. La Trista la i tîṅ sèg p'r al sò viàś in manéra 'd psēr tiràr avànti lē e 'l sò putèṅ ch'al gh'à da nàsar.