Tabarin di lusso
|
C'l artìcul chè 'l è scrit in
Miranduléś |
 Champagne | ||
| Tabarin di lusso | ||
 Jean Bradin e la Betty Balfour in na figùra dal film | ||
| Tabarèṅ ad lus 1928 | ||
|---|---|---|
| Regìa: Alfred Hitchcock | ||
| Scritōr: Alfred Hitchcock Walter C. Mycroft • Eliot Stannard | ||
| Atōr: Betty Balfour • Jean Bradin • Gordon Harker Ferdinand von Alten • Vivian Gibson • Jack Trevor Hannah Jones • Clifford Heatherley • Claude Hulbert Phyllis Konstam • Sunday Wilshin • Alexander D'Arcy | ||
| Müsica: / | ||
| Léngua: / | ||
| Dürä dal film: 105 minüt | ||
| Nasiōṅ: Régn Unî | ||
Tabarin di lusso (Tabarèṅ ad lus) 'l è 'n film mut girâ in biànc e négar dal 1928 'd Alfred Hitchcock.
A s trata dna cumèdia giràda par la British International Pictures ch'a Hitchcock la n è minga piaśùda dimóndi a dir dabòṅ tant da dir in n'intervìsta a François Truffaut che “'l è fàcil ch'a sia stâ 'l più brut film che mè a-j-àppia mai fat”.
Sunt
Mark (Gordon Harker) 'l è industriàł americàṅ ch'l à fat furtùna vindénd al champagne. Al gh'à na fiōla biónda piutòst arvèrsa e indipendènta ciamàda Betty (Betty Balfour) ch'la s è inamuràda 'd un śōvan (Jean Bradin) ch'a lò a n gh piàś minga tant parchè al créd ch'al s sia mis sèg sōl p'r i bèsi.
Un dè la ragàsa la ciàpa 'l aparéć ad famìja p'r andàr a catàr al sò muróś dirèt in nâṿ vèrs l'Európa. Muntàda su 'l tranśatlàntic cun na manóvra 'd salvatàǵ da part d'l equipàǵ, la Betty la fà gh na surpréśa e la gh diś ch'la gh'à intensiòṅ ad spuśar-al pròpria lè e ch'la s è bèla misa 'd acòrd c'n al capitàṅ. A 'l sò ragàs a gh dà però fastìdi ch'l'àppia decìś tut lē, un cumpurtamènt brut dla gint cun di bèsi, e i dū i lìtgan. A bōrd a gh'è anc 'n óm più grand (Ferdinand von Alten) ch'a pâr interesàr-'s a la Betty tant ad snar insém méntar c'l àtar 'l armàgn in cabìna par via dal mâł ad mâr ch'al gh'à fat vgnir 'l urt dal gòmit.
Rivâ a Parì, la destinasiòṅ dal viàś, i dū i fànan paś e i vàn'n a na fèsta ma a 'l impruvìś a riva Mark ch'al diś a sò fiōla che par na crudàda in bórsa i èṅ dvintâ pòvar. Par la Betty 'l è 'n brut cōlp, la próa a vénd'r i sò biśù par far sù di bèsi ma la vîṅ rapinàda. La decìd acsè 'd andàr a lauràr par jutàr sò pàdar, la cata pòst in un tabarèṅ ad lus in dua la gh'à da véndar di fiōr.
In dal lucàl 'l incróśa 'l óm più grand ch'l iva vist su la nâṿ e insém i tōśan quèl da bévar a 'l tàvul. Subìt dòp a riva anc al sò muróś ch'al n è minga tant cuntènt che lē l'àppia catâ da lauràr lè ma specialmènt ch'la s divertìsa anc. Dòp un pôc al ragàs al và via ma po' al tórna cun Mark ch'al cunfèsa a sò fiōla ch'a n è minga véra ch'i èṅ dvintâ pòvar, al 'l iva dit sōl par dar-ag na lesiòṅ e par védar s'l interès dal sò muróś 'l éra sòlid dabòṅ.
La Betty la s arlìa dimóndi cun tut dū e la decìd 'd andàr a catàr a cà sua 'l óm misterióś dla nâṿ.