Sylva Koscina

C'l artìcul chè 'l è scrit in Miranduléś

La Sylva Koscina, nada Silvija Košćina (Śagàbria, 22 'd Agóst dal 1933 - Róma, 26 ad Dicémbar dal 1994, a s lèś [ˈsilva ˈkɔʃʃina] in itagliàṅ e [sǐlvija kǒʃtɕina] in Sèrb-Cruàt), l'è stada n'atōra e mudèla juguślàva cun sitadinànsa itagliàna.

Uriginària dal Régn ad Juguślàvia, da śōvna l'è vgnuda a star in Itàglia tgénd adrē a sò surèla. Durànt i sò studi ad fìśica a l'università di Studi ad Nàpuli Fedrîg II l'è stada nutàda da Eduardo De Filippo ch'al l'à ciamàda par far-ag far na part cica in dla cumèdia da lò dirèta Questi fantasmi (1954). In séguit a l'ém vista in dal còmig Siamo uomini o caporali, cun prutagunìsta Totò, in dla cumèdia La nonna Sabella (1957), cun la Tina Pica e Peppino De Filippo, e in dal stòrig La Gerusalemme liberata (1957), in dla part dla Clurìnda, persunàǵ d'l umònim puéma èpig ad Torquato Tasso.

In dal 1958 l'à tòlt part a 'l peplum Le fatiche di Ercole, in còpia cun Steve Reeves, e a la cumèdia Racconti d'estate in dua l'à laurâ cun Alberto Sordi, la Michèle Morgan e Marcello Mastroianni méntar 'l an dòp l'à recitâ in dla cumèdia Psicanalista per signora, a fiànc ad Fernandel e 'd Ugo Tognazzi, e in dal còmig Tempi duri per i vampiri cun Christopher Lee e Renato Rascel.

In di an Ssanta l'è stada prutagunìsta ad pelìculi cuma Il vigile (1960), a fiànc 'd Alberto Sordi e 'd Vittorio De Sica, 'l aventuróś L'uomo dalla maschera di ferro (1962), cun Jean Marais in di pagn ad D'Artagnan, Le massaggiatrici (1962), in dla part dla scaja Marisa, 'l aventuróś Il grande safari, laurànd in di Stat Unî cun Robert Mitchum, la cumèdia Se permettete parliamo di donne (1964), insém a Vittorio Gassman, Walter Chiari e Gigi Proietti, al fantàstic Giulietta degli spiriti ad Federico Fellini (1965), in dla part 'd una dal surèli dla Giulietta Masina, al śal britànig Più micidiale del maschio (1967) e 'l aventuróś La calata dei barbari (1968), cun Orson Welles e Robert Hoffmann.

Lē a Sanrémo 1972 insém a Villaggio e a Bongiorno

Àtar film ad chi an lè i èṅ stâ 'l drama eròtic Justine, ovvero le disavventure della virtù (1969), a fiànc ad Klaus Kinski e dla Romina Power, e la cumèdia a epiśòdi Vedo nudo (1969), c'n al rōl dna dóna ch'la dà ajùt a Nino Manfredi, frî in strada, ma quànd la 'l pòrta a 'l uśdàł tut i guàrdan lē daśmindgànd-as dal pasiènt.

In di an Stanta, dòp avē girâ a 'l film ad guèra I lupi attaccano in branco (1970) in còpia cun Rock Hudson, l'è pasàda a i śal e a i thriller in pelìculi cuma Il sesso del diavolo - Trittico (1971), in dua la fà l'asistènta dal cìrùśig Rossano Brazzi, Nel buio del terrore (1971), cun prutagunìsta la Marisa Mell, 7 scialli di seta gialla (1972), cun Anthony Steffen e l'Annabella Incontrera, La mala ordina (1972), cun prutagunìsta Mario Adorf, Rivelazioni di un maniaco sessuale al capo della squadra mobile (1972), cun Farley Granger, Lisa e il diavolo (1973), cun Telly Savalas in di pagn dal diàvul e l'Alida Valli in qvéi dla cuntésa, e Qualcuno ha visto uccidere... (1974), film spagnōl cun Ray Milland.

In chi an lè a l'ém vista anc in dla cumèdia Homo Eroticus (1971), in dua l'à incruśâ la Rossana Podestà, Lando Buzzanca, l'Adriana Asti, l'Ira von Fürstenberg e la Femi Benussi, in dal film spurcaciòṅ Boccaccio (1972), cun Enrico Montesano, e in dla pelìcula da rìdar Il cav. Costante Nicosia demoniaco ovvero: Dracula in Brianza (1975), insém a Lando Buzzanca, Rossano Brazzi, John Steiner, la Moira Orfei e la Valentina Cortese.

Prima 'd murìr a ssant'un an p'r un cànc'r a 'l téti l'à fat in tèmp a giràr soquànti atri cumèdi cuma Asso (1981), cun la còpia Adriano Celentano/Edwige Fenech, Questo e quello (1983), cun prutagunìsta Renato Pozzetto e Nino Manfredi, Mani di fata (1983), in di pagn dla cuntésa Irene, Rimini Rimini (1987), in dua l'à catâ Jerry Calà, Paolo Villaggio, la Serena Grandi e la Laura Antonelli, e Ricky & Barabba (1992), faghénd la part dna dóna spuśàda cun di bèsi ch'la fà la sivéta c'n al barbòṅ Christian De Sica cardénd-'l un migliardàri indiàṅ.