Susan Cabot

C'l artìcul chè 'l è scrit in Miranduléś

LʼHarriet Pearl Shapiro, cgnusùda méj cuma Susan Cabot (Boston, 9 ad Luj dal 1927 - Encino, 10 ad Dicémbar dal 1986), l'è stada n'atōra americàna.

L'è mòrta masàda a sprangàdi par maṅ ad sò fiōl, nâṅ e mèś insiminî, quànd la gh'iva sinquànta-nóṿ an.

Biugrafìa

Nada in Massachusetts da na famìja ebrèja ch'la daśvgnìva da la Rùsia, la Cabot da pìcula l'è pasàda da di genitōr adutìṿ a di àtar.

Da śōvna l'à tacâ a lauràr faghénd l'ilustradōra a New York ma anc la cantànta e l'atōra a teàtar. In dal 1947 l'à fat al sò debùt a 'l cìnema in dal noir Il bacio della morte cun prutagunìsta Victor Mature. In séguit la s trasferìs in Califòrgna par lauràr prima cun la Columbia Pictures e pò, dagnóra subìt, cun la Universal Pictures, firmànd un cuntràt in escluśìva e girànd soquànt film western cuma Tomahawk - Scure di guerra (1951), Kociss, l'eroe indiano (1952) e Il dominatore del Texas (1953).

Minga cuntènta dal parti ch'i gh fàvan far, la Cabot la tórna a New York par recitàr a teàtar, cuma in dla pièce A Stone for Danny Fisher, ma pò la gira listés soquànt film par Roger Corman a Hollywood cuma Carnevale rock (1957), La ragazza del gruppo (1957), La leggenda vichinga (1957), La legge del mitra (1958) e La donna vespa (1959).

Dòp un prim matrimòni (1944-1951) cun Martin Sacker, par soquànt an la Cabot l'è stada ligàda a 'l re Hussein dla Giurdàgna. In dal 1964 la gh'à abû sèg al sò ùnic fiōl, Timothy Scott, nâ fóra da 'l matrimòni e afèt da nanìśum e cun di prubléma 'd tèsta. Saddam Hussein al gh ślungàva mila-e-sincsènt dòlar a 'l méś par vìvar e tiràr-al sù. In dal 1968 la s è spuśàda c'n al sò secónd marè, Michael Roman, prima 'd divursiàr sèg in dal 1983.

In di an Ssanta la Cabot la s è ritiràda da la vita pùblica, faghénd na quàlc vòlta di lavursèṅ a teàt'r o in televiśiòṅ cuma in dal telefìlm Gente di Hollywood (1969).

In di ùlt'm an ad vita la Cabot la gh'à abû di prubléma 'd depresiòṅ, cun di atàc ad pànig e di pinsēr brut ad tōr-as la vita. Anc s'la gh'iva 'l apòǵ di psicòlug, al sò cundisiòṅ i èṅ pegiuràdi in fiṅ tant che sò fiōl Timothy al l'à cupàda tirànd-ag di cōlp cun na śbara p'r alvàr i pēś. Al ragàs, ch'in alóra al gh'iva vint-a-dū an, al s è diféś dgénd ch'al gh'iva 'l diàv'l adòs par via dal madśìni ch'l éra custrét a tōr a càuśa dla sò cundisiòṅ e par di distùrub a la giàndla pituitària, vgnénd acsè asòlt da part di guùdas.

Filmugrafìa

1947 - Il bacio della morte (Kiss of Death), regìa 'd Henry Hathaway
1950 - On the Isle of Samoa, regìa ad William Berke
1951 - La città è salva (The Enforcer), regìa ad Bretaigne Windust
1951 - Tomahawk - Scure di guerra (Tomahawk), regìa ad George Sherman
1951 - Il principe ladro (The Prince Was a Thief), regìa ad Rudolph Maté
1951 - Jeff, lo sceicco ribelle (Flame of Araby), regìa ad Charles Lamont
1952 - Kociss, l'eroe indiano (The Battle at Apache Pass), regìa ad George Sherman
1952 - Duello al Rio d'argento (The Duel at Silver Creek), regìa ad Don Siegel
1952 - Il figlio di Alì Babà (Son of Ali Baba), regìa ad Kurt Neumann
1953 - Il dominatore del Texas (Gunsmoke), regìa ad Nathan Juran
1954 - La mano vendicatrice (Ride Clear of Diablo), regìa ad Jesse Hibbs
1957 - La ragazza del gruppo (Sorority Girl), regìa ad Roger Corman
1957 - La leggenda vichinga (The Saga of the Viking Women and Their Voyage to the Waters of the Great Sea Serpent), regìa ad Roger Corman
1957 - Carnevale rock (Carnival Rock), regìa ad Roger Corman
1958 - La legge del mitra (Machine-Gun Kelly), regìa ad Roger Corman
1958 - Il forte del massacro (Fort Massacre), regìa ad Joseph M. Newman
1958 - Guerra dei satelliti (War of the Satellites), regìa ad Roger Corman
1959 - Tre anni di inferno (Surrender - Hell!), regìa ad John Barnwell
1959 - La donna vespa (The Wasp Woman), regìa ad Roger Corman

Culegamènt estéran

(IT) La sò paśna su 'l IMDb

Àtar prugèt

Wikiquote contiene citazioni di o su Susan Cabot
Wikimedia Commons contiene file multimediali su Susan Cabot