Vai al contenuto

Steve Guttenberg

Da Wikipedia.

C'l artìcul chè 'l è scrit in Miranduléś Emiliàn

Steve Guttenberg tòlt śò in dal 2005


Steven Robert Guttenberg, cgnusû méj cuma Steve Guttenberg (New York, 24 'd Agóst dal 1958, a s lèś [stiːv ˈɡʌtənberɡ] in ingléś), 'l è 'n atōr, regìsta e còmig americàṅ, cun di urìgini ebrèj. 'L à da spés fat la part d'l óm ch'at pō catàr dapartùt, d'l amìg vśèṅ 'd cà. Al gh'à na stéla in dla Hollywood Walk of Fame.

Da śōvan 'l à studiâ par 'n an a l'Università statàł ad New York a Albany ma pò 'l è andâ a pascàr furtùna in Califòrgna vlénd dvintàr 'n atōr ad mistēr, tacànd a lauràr a daśnóṿ an tulénd part a soquànt telefìlm cuma In casa Lawrence e pelìculi cuma Rollercoaster - Il grande brivido. In dal 1978 'l à girâ al thriller I ragazzi venuti dal Brasile a fiànc ad pès da nuànta cuma Laurence Olivier, Gregory Peck e James Mason.

In di an Utànta la sò caréra la ciàpa 'l vōl quànd al rècita da prutagunìsta in dla cumèdia A cena con gli amici (1982), a fiànc ad Mickey Rourke e 'd Kevin Bacon, e pò tulénd part a pelìculi ad sucès cuma 'l drama The Day After - Il giorno dopo (1983), in còpia cun John Lithgow, e la cumèdia Scuola di polizia (1984) in dla part dal cadét pulisiòt Carey Mahoney. Cal film chè specialmènt al gh'à 'n sucès clamuróś faghénd sù sènt-sinquànta migliòṅ ad dòlar dòp ès'r-an custâ gnanc sinc. Guttenberg al girarà tri séguit in dal gir ad tri an: Scuola di polizia 2 - Prima missione (1985), Scuola di polizia 3 - Tutto da rifare (1986) e Scuola di polizia 4 - Cittadini in... guardia (1987).

Sèmp'r in chi an lè a 'l ém vist in di film fantàstic Cocoon - L'energia dell'universo (1985), cun la Jessica Tandy, e Corto circuito (1986), in dla part dal dutōr espèrt in robot Newton Crosby, e in dal thriller La finestra della camera da letto (1987) cun l'Isabelle Huppert. 'N àtar sò gran sucès 'l è stâ Tre scapoli e un bebè (1987), in dua lò 'l éra òṅ di tri put, insém a Tom Selleck e a Ted Danson, ch'al gh'iva da far i cònt c'n un putèṅ da tiràr sù. Dal 1990 'l è invéci Tre scapoli e una bimba, sèmpar c'n al stés cast ad prutagunìsta.

In di an Nuànta al sucès 'l è però sparî cuma na bóla 'd savòṅ, cun lò ch'l à tacâ a giràr in film cic. A 'l arcurdém in tut al manéri in dla cumèdia dramàtica A casa per le vacanze (1995), a fiànc dl'Holly Hunter, ad Robert Downey Jr. e dl'Anne Bancroft, e in dal fantàstic Casper - Un fantasmagorico inizio (1997). In dal 2002 'l à dirèt al film P.S. Your Cat Is Dead! cun la Shirley Knight.

In televiśiòṅ 'l à recitâ in soquànt telefìlm cuma Veronica Mars e Law & Order: Criminal Intent. In dal 2008 'l à fat al cuncurènt in dla prugràma Dancing With The Stars durànt la sèsta stagiòṅ su 'l canàł ABC.

Filmugrafìa

[mudéfica la surzéia]
La fnèstra dla cambra da lèt (1987)
P.S. Al tò gat 'l è mòrt (2002)

cuma atōr

[mudéfica la surzéia]

cuma regìsta

[mudéfica la surzéia]

Culegamènt estéran

[mudéfica la surzéia]

Àtar prugèt

[mudéfica la surzéia]
Estratto da "https://eml.wikipedia.org/w/index.php?title=Steve_Guttenberg&oldid=165653"