Stanley Kubrick
|
C'l artìcul chè 'l è scrit in
Miranduléś |
_crop.jpg)
Stanley Kubrick (New York, 26 ad Luj dal 1928 - St Albans, 7 ad Mars dal 1999, a s lèś /ˈstænli ˈkubɹɪk/ in ingléś) 'l è stâ 'n regìsta, senegiadōr e prudutór americàṅ naturaliśâ britànic.
A darsèt an 'l à tacâ a far al futógrafar par pò pasàr a giràr di ducumentàri e dal pelìculi ch'i aṅ fat la stòria dal cìnema, catànd sèmp'r al gust dal pùblic e dla crìtica. 'L à fat di film ad tut i gènar, tgnénd adrē a 'l sò parfesiunìśum e la vója 'd mantgnìr al cuntròl su 'l sò òvri, druànd dal técnichi anc sperimentàli e na cria 'd umurìśum négar.
I sò film i èṅ stâ candidâ par trédas vòlti a i Prèmi Òscar ma 'l à purtâ a cà sōl na statṿa, qvéla dal 1968 p'r i efèt speciài ad 2001: Odissea nello spazio. Anc a i Golden Globe al giurìi i gh'aṅ da spés arvultâ 'l spali: siē candidadùri e gnanc un prèmi.
'L à bandunâ 'l sò paéś p'r al Régn Unî in dal 1961 parchè al gh'iva paùra di crìmin sèmpar élt in di Stat Unî ma anc p'r al daśgùst ch'a gh dava Hollywood. 'L è mòrt a stant'an in dla sò cà par 'n infàrt, subìt prima ch'a vgnis fóra 'l sò ùltim film cun Tom Cruise e la Nicole Kidman ch'l iva péna finî, Eyes Wide Shut.
Filmugrafìa
- 1953 - Paura e desiderio (Fear and Desire)
- 1955 - Il bacio dell'assassino (Killer's Kiss)
- 1956 - Rapina a mano armata (The Killing)
- 1957 - Orizzonti di gloria (Paths of Glory)
- 1960 - Spartacus
- 1962 - Lolita
- 1964 - Il dottor Stranamore - Ovvero: come ho imparato a non preoccuparmi e ad amare la bomba (Dr. Strangelove or: How I Learned to Stop Worrying and Love the Bomb)
- 1968 - 2001: Odissea nello spazio (2001: A Space Odyssey)
- 1971 - Arancia meccanica (A Clockwork Orange)
- 1975 - Barry Lyndon
- 1980 - Shining (The Shining)
- 1987 - Full Metal Jacket
- 1999 - Eyes Wide Shut