Madison Brengle

Da Wikipedia.

C'l artìcul chè 'l è scrit in Miranduléś Emiliàn


La Brengle tòlta śò in dal Luj dal ’11


La Madison Brengle (Dover, 3 'd Avrìl dal 1990) l'è na tenìsta americàna. L'è élta 163 cm e la péśa 60 chilo. La dróa al bras dèstar e la tira 'l arvèrs, al cōlp ch'a gh piàś da piò, a dū maṅ.

In dla sò caréra l'è rivàda a èsar la nùmar ssanta-quàtar dal mónd in dal Śnar dal 2015. L'à vins sèt turnèo ITF e l'à śugâ cun l'Heather Watson la finàł dal turnèo internasiunàl 'd Hobart in dal 2015 pardénd-la.

Caréra

In dal 2007 la Brengle la riva in finàł in dū ITF americàṅ da vintsìnc-mila dòlar baténd in d'l an anc dal śugadōri cuma l'Ekaterina Makarova o la Flavia Pennetta a Los Angeles. 'L an dòp la riva in semifinàł in d'l ITF da sinquànta-mila dòlar ad Las Vegas baténd la Sesil Karatančeva, l'Yvonne Meusburger e la Stéphanie Cohen-Aloro prima 'd cédar a l'Asia Muhammad par 3-6 5-7. In Maǵ la śōga a 'l Roland Garros cun na carta salvàdga ma la pèrd subìt da la Bethanie Mattek-Sands.

In dal 2009 in di turnèo WTA la pasa 'l qualificasiòṅ sōl a Charleston ma la và fóra subìt cun l'Anastasija Rodionova. In dal 2010, fra élt e bas, la riva in finàł in d'l ITF ad Boston pardénd cun la Jamie Hampton par 2-6 1-6.

L'americàna durànt al turnèo ad Wimbledon dal 2014

In dal 2011 la pèrd 'n ITF da vintsìnc-mila dòlar cun la Michelle Larcher De Brito ma l'in vins òṅ in Mars cun la Stéphanie Foretz Gacon. In Luj la s qualìfica p'r al turnèo WTA ad Washington baténd la Beatrice Capra ma pò la và fóra in di utàṿ cun la Tamira Paszek. In Agóst la bat l'Elena Bovina in dal Bronx e la riva in di quàrt in dua la patìs un 6-3 6-7 3-6 da la Camila Giorgi. L'americàna la pèrd àtar sinc incónt'r ad fila prima ad rivàr in di quàrt in d'l ITF ad Kànsas City (Missouri) (6-4 3-6 3-6 da la Jamie Hampton). La sèra 'l an da nùmar 192 dal mónd.

In dal 2012 la vins 'l ITF ad Fort Walton Beach baténd l'Eugenie Bouchard 6-0 6-2, la Camila Giorgi 7-5 6-4 e la Tereza Mrdeža 6-4 3-6 6-3 ma in dal rèst dla stagiòṅ la fà sù pôc. In dal 2013 la vins 'l ITF ad Rancho Santa Fe (vintsìnc-mila dòlar) baténd la Nicole Gibbs par 6-1 6-4. In Avrìl la riva in semifinàł a Charlottesville e in di quàrt a Indian Harbour Beach, dū ITF da sinquànta-mila dòlar. In Śugn, in sl'èrba ingléśa ad Nottingham, la pèrd in tri set prima da l'Eugenie Bouchard e pò da la Nastassja Burnett. In Luj la riva in finàł a Sacramento, pò la s mét in bisàca 'l tìtul ad Landisville, al nùmar 2. In Agóst la n pasa minga 'l qualificasiòṅ a gl'US Open anc s'la bat la Barbora Záhlavová-Strýcová e l'Erika Sema. C'n i punt muciâ sù in soquànt ITF a la fiṅ dla stagiòṅ (tri quàrt, na semifinàł e na finàł) la riva a la puśisiòṅ 153 dal mónd.

In dal 2014 la s qualìfica p'r al turnèo internasiunàł 'd Hobart e par pôc la n fà mia la fèsta a la Samantha Stosur ch'la vins sèg sōl par 6-7 6-1 7-6. In Mars la pèrd da gl'itagliàni Camila Giorgi in dal qualificasiòṅ 'd Indian Wells e da la Gioia Barbieri in di quàrt d'l ITF 'd Innisbrook. In Maǵ baténd la Yanina Wickmayer la riva in di utàṿ a Praga ma pò la céd a l'Aleksandra Krunić par 2-6 6-1 2-6. In Luj la vins al tìtul ITF ad Lexington dand la paga a la Romina Oprandi, a la Melanie Oudin e a la Nicole Gibbs. In d'l ITF ad Vancouver, al nùmar 2, la s férma in semifinàł e pò la pasa 'n tùr'n a gl'US Open. In Setémbar la s mét in bisàca al turnèo ITF ad Las Vegas baténd la Michelle Larcher De Brito par 6-1 6-4. In Utóbar la s qualìfica a Linz in dua la pèrd par 4-6 4-6 da la Karolína Plíšková in di quàrt. Par la prima vòlta in dla sò caréra la gh la cava a insfilsàr-as fra 'l primi sènt śugadōri dal mónd.

L'americàna la taca a la granda la stagiòṅ 2015 cun gl'utàṿ a Brisbane (3-6 6-7 da la Kaia Kanepi) e la finàla a Hobart cun l'Heather Watson, cun l'ingléśa ch'la gh'à la méj par 6-3 6-4.

Culegamènt estéran